ತುಳು ಪಾಡ್ದನಾಟು ಬೆನ್ನಿ

ತುಳುನಾಡ್ದ ಪಾಡ್ದನೊಲೆಟ್ ಬೆನ್ನಿ ಬದ್‍ಕ್‍ತ ಚಿತ್ರಣೊ

ಬೆನ್ನಿತ ಕಂಡೊಟು ಪಾಡ್ದನೊಲೆನ್ ಪನ್ಪಿನಂಚನೇ ಪಾಡ್ದನೊಲೆಟ್ ಬೆನ್ನಿತ ಚಿತ್ರೊಣೊನು ಗುರುತಿಸಾಯೆರೆ ಸಾಧ್ಯ ಉಂಡು. ತುಳುನಾಡ್‍ತ ಮಸ್ತ್ ಪಾಡ್ದನೊಲೆನ ಮುಖ್ಯ ಹಿನ್ನಲೆ ಬೆನ್ನಿನ ವಸ್ತು. ಆರಾಧನೆ ಮಲ್ಪಿನ ಅಲೌಕಿಕ ಶಕ್ತಿಲೇ ಮುಲ್ಪ ಸಾಗುವಳಿದಾಯೆ ಆದಿಪ್ಪುನ ಚಿತ್ರಣೊ ಬೊಡಾಯಿನಾತ್ ತಿಕ್ಕೊಂದುಂಡು. ಇಂಚಿತ್ತಿ ಪಾಡ್ದೊನೊಳೆನ್ ವಿಶ್ಲೇಷಣೆ ಮಲ್ಪುನೇಡ್ದಾರೋ ತುಳುನಾಡ್‍ದ ಬೆನ್ನಿದ ಚರಿತ್ರೆ, ಬೊಕ್ಕ ಪಾಡ್ದನ ರಚನೆತ ಕಾಲದ ಬೆನ್ನಿತ ಸ್ವರೂಪೊ ಉಂದೆನ್ ತೆರಿಯೆರೆ ಸುಲಭೊ ಆಪುಂಡು. ಅತ್ತಾಂದೆ, ಆಯಿಡ್ದ್ ಬುಕ್ಕೊ ಆಯಿನ ಬದಲಾವಣೆನ್‍ಲಾ ತೆರಿಯೆರೆ ಸಾಧ್ಯ ಉಂಡು. ನಮ ದುಂಬು ಉಲ್ಲಾಯಿನ ಮುಖ್ಯ ಪಾಡ್ದನೊಲಾಯಿನ, ಪಂಜುರ್ಲಿ, ಕೋಟಿ ಚೆನ್ನಯೆ, ಸಿರಿ, ಮುಲಾರ ಪಂಜುರ್ಲಿ, ಪೊಸÀ ಮಾರಾಯೆ, ಪಿಲಿ ಚಾಮುಂಡಿ, ಬೊಬ್ಬೆರ್ಯೆ, ಜಾರಂದಾಯೆ, ಬಲಿಯೇಂದ್ರೆ, ಪರತಿಮಂಞ್ಞಣೆ, ಅಮಸರಂದ ಮೆನ್ನೂಡಿ ಈ ಮಾಂತಾ ಪಾಡ್ದನೊಲೆಟ್ ಬೆನ್ನಿತ ರೀತಿ-ನೀತಿ, ಬಿತ್ತ್-ಬುಳೆ, ಕಳ-ಕೂಟೊ, ಹತ್ಯಾರೊಲೆನ ವಿವರಣೆ ತೆರಿದ್ ಬರ್ಪುಂಡು. ಉಂದೆನ್ನ ಆಧಾರೋಟು ತುಳು ಸಂಸ್ಕøತಿತ ತಿರೆಳ್ ತೆರಿಯರೆಲಾ ಸಾಧ್ಯೊ ಉಂಡು. ಈಂಚಿತ್ತಿ ಪಾಡ್ದೊಳೆನ್ ಪರಿಚಯೊ ಮಲ್ಪಿನ ಕೆಲಸೊ ಮೂಲು ಮಲ್ತ್Àತೆ.

ತುಳುನಾಡ್‍ತ ಮಾತಾ ಕಡೆಟ್ಲಾ ತಿಕ್ಕುನಂಚಿನ ಪಾಡ್ದನೊ ಪಂಜುರ್ಲಿ. ಈ ಪಾಡ್ದನೊದ ಬೇತೆ ಬೇತೆ ಭಾಗೊಟು ಬೆನ್ನಿತ ನಾನಾ ವಿವರಣೆ ತಿಕ್ಕೊಂದುಂಡು. ಭೂಮಿ ಪುಟ್ಟಿನ ಸಂದರ್ಭೊಟು ‘ಬುಳೆಟ್ ಮೇಲ್ ಉದ್ಯ ಬೆನ್ಪುಂಡು ಅತಿಕಾರೆ ಪನ್ಪುನ ಸತ್ಯದ ಬುಳೆ’ ಇಂಚ ಪನ್ಪಿನ ಮೂಲಕೊ ಅತಿಕಾರೆ ಬುಲೆತ ಪುರಾಕ್‍ನ್ ಈ ಪಾಡ್ದನೊ ಸುರೂಕು ಪನ್ಪುಂಡು. ಪಂಜುರ್ಲಿ ಪಾಡ್ದನದ ಕಥಾ ನಾಯಕೆ ಈಸ್ವರೆ, ಆಯೆ ಒರಿ ಸಾಗುವಳಿತಾಯೆ, ಬೊಕ್ಕೊ ಆಯೆ ದೇವೆರ್. ಈಸ್ವರೆ ದೇವೆರ್‍ನ ನಂದನವನೊ ಬೊಕ್ಕ ಆಸ್ ಪಾಸ್‍ತ ಬೆನ್ನಿನ ವರ್ಣನೆ ಈ ಪಾಡ್ದನೊಟು ಬರ್ಪುಂಡು. ಬೆನ್ನಿನ್ ಒರಿಪಾಯರೆ ಈಸ್ವರ ಮಾಲ್ತಿನ ಬೋಂಟೆದ ಕಾಲೊಟು ತಿಕ್ಕಿನ ಪಂಜಿತ ಕರ್ಲೆಲೆನ್ ಅಯನ ಬುಡೆತಿ ಪಾರ್ವತಿ ಸಾಂಕುವಲ್, ಈ ಕುರ್ಲೆಲು ಮಲ್ಲೆ ಆನಾಗ ಈಸ್ವರನ ಕಂಡತ ನೆರೆಕರೆ ಇತ್ತಿನ ಬೀರ ಬಿರ್ಮಣ ಬಲ್ಲಾಳೆರೆನ ಕಂಡೊತ ಕೈಯಿ ತಿನಿಯರೆ ಪೋಪೋ, ಅತ್ತಾಂದೆ ಕೈಯಿನ್ ಹಾಳ್ ಮಲ್ಪುವೊ. ಈಸ್ವರನ ಪಂಜಿಲು ಕೈಯಿ ಹಾಳ್ ಮಲ್ತಿನೆನ್ ತೂಯಿನ ಬಲ್ಲಾಳೆ, ಈಸ್ವರನ್ ಬಾಯಿಗ್ ಬತ್ತಿಲೆಕ್ಕೊ ನೆರ್ಪೆ. ಆಯೆನ್ ಕೇಂಡ್‍ತ್ ಕೋಪಿತನ ಈಸ್ವರೆ, ಬಿಲ್ಲ್ ಪಗಾರಿ ದೊತ್ತ್‍ಂದ್ ಪಂಜಿಲೆನ್ ಕೆರ್ತ್ ಬುಡ್ಪೆ.

ಈ ಪಾಡ್ದನೊಟು ಸಾಗುವಳಿ, ಬೊಕ್ಕ ಸಾಗುವಳಿತಾಯೆ ಇಂಚ ಈ ರಡ್ದ್ ವಿಭಾಗೊಗು ತೊಂದರೆ ಕೊರ್ಪಿನ ಬಾಹ್ಯ ಶಕ್ತಿದ ಬಗ್ಗೆ ವಿವರಣೆ ಉಂಡು. ಪಂಜಿಯೊಂಜಿ ಬೆನ್ನಿದ ಕಳೊಟು ಅಲೌಕಿಕವಾದ ಏರುನ ಎತ್ತರೊನು ಈ ಪಾಡ್ದನೊ ಪನ್ಪುಂಡು. ಅಂಚನೆ ಪಾಡ್ದನೊಟು ಬರ್ಪಿನ ‘ಆಯಿರೆ ಬಲ್ಲಾಳೆರೆನ ಅತಿಕಾರೆ ಬುಳೆತ ಪರಿಮಳ ಬತ್ತ್‍ಂಡ್’ಂದ್ ಪನ್ಪಿನಾಡೆಗೆ ಅತಿಕಾರೆ ಬುಳೆತ ಪುದರ್ ಈ ಪಾಡ್ದನೊದ ಉದ್ದೊಗ್‍ಲಾ ಬರೋತ್ತಿಪುಂಡು. ಅಂಚಾತ್ ಅತಿಕಾರೆ ಬಾರಿ ಪುರಾಕ್‍ದ ಬುಳೆ, ಮಾತ್ರೊ ಅತ್ತ್ ಆಯಿನ್ ಬಲ್ಲಾಳೆರ್ರೆನಂಚಿನ ಮಲ್ಲ ಇಲ್ಲ್‍ತಕುಲು ಬುಳೆಪಾವೋಂತು ಇತ್ತೇರ್‍ಂದ್ ಪನ್ಪಿನವು ತೆರಿದ್ ಬರ್‍ಪುಂಡು. ಅಂಚನೇ ಈಸ್ವರೆ ಪಂಜಿನ್ ಎಂಚ ಬೋಂಟೆ ಮಲ್ತ್‍ದೇಂದ್ ಉಂದ್ವೇ ಪಾಡ್ದನದ ಈ ಭಾಗೊ ಪನ್ಪುಂಡು ‘ಪುಣಿತ ಮರೆಯರೆ ಈಸ್ವರೆ ಪೋನಗ, ಕೈಯ್‍ತ ಮರೆ ಮರೆ ಪೋಪೋ ಪಂಜಿಲು. ಕೆಯ್‍ತ ಮರೆ ಮರೆ ಈಸ್ವರೆ ಪೋನಗ, ಪುಣಿ ಮರೆ ಮರೆ ಪೋಪೊ ಪಂಜಿಲು’. ಇಂಚ ಬುಳೆ ಒರಿಪಾವುನ ಬೊಕ್ಕ ಬುಳೆ ಕಳೆಪುನ ರಡ್ಡ್ ಶಕ್ತಿಲು ತಾಂಟುನೆನ್ ಈ ಪಾಡ್ದನೊ ತೆರಿಪಾಪುಂಡು. ಈ ಪಾಡ್ದನೊಟು ಬರ್ಪಿನ ಅತಿಮಾನುಷ ವಿಚಾರೊಲೆನ್ ಬುಡ್‍ಂಡ ಉಂದು ಒರಿ ಸಾಗುವಳಿತಾಯನ ಬದ್‍ಕ್‍ದ ವಿವರಣೆನ್ ಕೊರ್ಪಿನಂಚಿನವು.

ಬೆನ್ನಿದ ಬಗ್ಗೆ ಕಣ್‍ಗ್ ಕಟ್ಟಿಲೆಕ್ಕೊ ಪನ್ಪಿನ ನನೊಂಜಿ ಪಾಡ್ದನೊ ಕೋಟಿ-ಚೆನ್ನಯ. ಈ ಪಾಡ್ದನೊಡು ಬೆನ್ನಿದ ಮಸ್ತ್ ವಿಷಯೊಲು ಬಾರಿ ಪೊರ್ಲುಡು ವರ್ಣನೆಯಾತುಂಡು. ಈ ಪಾಡ್ದನದ ನಾನಾ ಸಂದಿಲು ಬೆನ್ನಿದ ಬೇತೆ ಬೇತೆ ಮಜಲುಲೆನ್ ತೆರಿಪಾದ್ ಕೊರ್ಪುಂಡು. ಉಂದೆಟ್ ಬರ್ಪಿನ ಪೆರುಮಲೆ ಬಲ್ಲಾಳೆ, ಬಾರಿ ಮಲ್ಲ ಬೆನ್ನಿದಾಯೆ. ಬೆನ್ನಿದ ರಕ್ಷಣೆಗ್ ಬೋಂಟೆ ಮಲ್ಪುನಾಗ ಆಯನ ಕಾರ್‍ಗ್ ಕಾಯರದ ಮುಳ್ಳು ಕಂತುಂಡು. ಅವುವೇ ದುಂಬುದ ಕತೆಕ್ ಸಾದಿಯಾಪುಂಡು. ಕೋಟಿ-ಚೆನ್ನಯರ್ ಪುಟ್ಟಿನೈಕ್ ದುಂಬೇ ಪೆರುಮಲೆ ಬಲ್ಲಾಳೆ ದೇಯಿ ಬೈದೆತಿಟ ‘ಕನ್ನೆಟಿ ಕಂಬಳದ ಕೋಡಿಕೊಳಂಜಿ ಯಾನ್ ಬುಡುತ್ ಕೊರುಪೆ ನಿನ್ನ ಬಾಲೆಲುಗ್. ಅಡಪ್ಪಿಯರೆ ಎರು, ಬಿತ್ಯರೆ ಬಿತ್ತ್, ಕಡ್‍ಪ್ಯೆರೆ ಕತ್ತಿ, ಒಂಜಿ ವರ್‍ಸೊತ ಬೆನ್ನಿದ ಕರ್ಚಿ ಯಾನ್ ಕೊರ್‍ಪೆಂದ್ ಬಲ್ಲಾಳೆ ಬಾಸೆ ಕೊರ್ಪೆ. ಪೊಸ ಬೆನ್ನಿ ಮಲ್ಪುನಾಯಗ್, ಬೆನ್ನಿಗ್ ಬೋಡಾಯಿನ ಮಾಂತಾ ಹತ್ಯಾರೊಲೆನ್ ಕೊರ್ಪಿನ ಕ್ರಮ ದುಂಬು ಇತ್ತ್‍ಂಡ್‍ಂದ್ ಪನ್ಪಿನವು ಪಾಡ್ದನೊತ ಈ ಭಾಗೊಟು ತೆರಿಯೆರೆ ಸಾಧ್ಯವುಂಡು. ಬಾರಿ ಮಲ್ಲ ಉಪಕಾರೊ ಸರಣೆಯಾತ್ ಉಂಬಳಿ ಕೊರ್ಪಿನ ಕ್ರಮೊ ಇತ್ತಂಡ್‍ಂದ್‍ಲಾ ಉಂದೇಡ್ದೇ ತೆರಿದ್ ಬರ್ಪುಂಡು. ಕೋಟಿ-ಚೆನ್ನಯೆರೆಗ್ ಬಲ್ಲಾಳೆ, ಅಕುಲೆನ ಅಪ್ಪೆನ ಉಪಕಾರೊಗು ಬದಲಾತ್ ಕಂಡೊ ಉಂಬಳಿ ಕೊರ್ಪಿನವು ಮಾಮಲ್ಲ ವಿಚಾರೊನೇ ಸರಿ. ಅಂಚನೆ ಬಲ್ಲಾಳ್ರೆನ ಕಾಲೊಟು ನಡತ್ತೊಂದಿತ್ತಿನ ಕಂಬಳದ ವಿವರಣೆಲಾ ಈ ಪಾಡ್ದನೊದ ಕೆಲವು ಕಡೆಟ್ ಬರೋಂದಿಪ್ಪಂಡು.

ಕೋಟಿ-ಚೆನ್ನಯೆರ್ ಮಲ್ಲೆ ಆಯಿನೆಡ್ದ್ ಬುಕ್ಕೊ ಅಕುಲೆನ ಕುಲಕಸುಬ್ ಮೂರ್ತೆದೊಟ್ಟುಗು ಬೆನ್ನಿನ್‍ಲಾ ಸುರು ಮಲ್ತೆರ್. ಬಲ್ಲಾಳೇಂದ್ ಪನ್ಪಿನ ನಿಪುಣ ಬೆನ್ನಿದಾಯನ ಕೈತಡಿಟ್ ಕೋಟಿ-ಚೆನ್ನಯೆರ್ ಸಹಜವಾದ್ ಎಡ್ಡೆನೇ ಸಾಗುವಳಿ ಕಲ್ತೆರ್. ಬಲ್ಲಾಳೆರೆಟ ಕೋಡಿ ಕೊಳಂಜಿನ್‍ಲಾ ಕೇಣ್ಪೆರ್. ಅಪಗ ಬಲ್ಲಾಳೆರ್ ‘ಕನ್ನೆಟಿ ಕಂಬಳತ ಒತ್ತೊತ್ತಿನ ಕೋಡಿ ಕೊಳಂಜಿನ್ ದೇಯಿ ಬೈದೆತಿಗ್ ಬುಡುತ್ತ್ ಕೊರ್ತೇ. ಸುರುತ ವರ್ಷೊದ ಬೆನ್ನಿಗ್ ಬೊಡಾಪಿ ಒಂಜಿ ಜೊತೆ ಎರು, ಆ ಕಂಡೊಗು ಬೋಡಾಯಿನ ಬಿತ್ತ್, ನೊಗೊ-ನಾಯೆರ್, ಬಳ್ಳ್, ಕತ್ತಿ, ಮಾಂತಾ ದೇಯಿ ಬೈದೆತಿಗ್ ಬುಡ್ತ್ ಕೊರ್ತೆ. ಐನ್ ನಿಕುಲೆಗ್‍ಲಾ ಕೊರ್ಪೇಂದ್’ ಪನ್ಪೆರ್. ಇಂಚ ದಾನ ಕೊರ್ನೆನ್ ಪಾತೆರೊ ತಪ್ಪಾಂದೆ ಕೊರೊಡೂಂದ್ ಪನ್ಪಿನವು ಬಲ್ಲಾಳೆರೆನ ಈ ಪಾತೆರೊಟು ತೆರಿಯರಾಪುಂಡು.

ಪಾಡ್ದನೊತ ದುಂಬುತ ಭಾಗೊಟು ಕೋಟಿ-ಚೆನ್ನಯೆರ್ ಬೆನ್ನಿ ಬೆನ್ಪುನ ವಿಚಾರೊದ ವಿವರಣೆ ಉಂಡು, ‘ಕೋಡಿ ಕೊಳಂಜಿತ ಬರಿಯೇ ಕಾಡ್ ಕಡ್ಪುವೆರ್ ಜೊಕುಲು, ಕಾರಿ ಬೊಳ್ಳಿಂದ್ ಒಂಜಿ ಜೊತೆ ಎರುಕುಲೆನ್ ದೆತ್ತೆರ್ ಬಲ್ಲಾಳ್ರೆಟ, ನುಗೋ ನಾಯೆರ್ ಬಲ್ಲ್ ಕೊರಿಯೆರ್ ಬಲ್ಲಾಳ್ರ’. ಇಂಚ ಬೆನ್ನಿದ ಕೆಲಸೊ-ಕಜ್ಜೊನು ಸುರು ಮಲ್ತೆರ್ ಜೋಕುಲು. ಬೇತೆ ಬೇತೆ ಪಾಡ್ದನೊಳೆಟ್ ಬರ್ಪಿನ ಲೆಕ್ಕೊನೇ ಕಾರಿ ಬೊಳ್ಳಿದ್ ಪನ್ಪಿನ ಎರುಕುಲು ಈ ಪಾಡ್ದನೊಟ್ಲಾ ಬರ್ಪುಂಡು.

ಒಂಜೇ ಬೈಲ್‍ತ ನೆರೆಕರೆ ಇತ್ತಿನ ಯಜಮಾನ್ಯೆರೆಟ ಜಗಳೊ ಮಾಮೂಲೂಂದು ಪನ್ಪಿನೈಕ್ ಬುದ್ಯಂತನ ಜಗಳೊ, ಮಚ್ಚರೊ, ಕೋಪೊ, ಉಂದು ಎಡ್ಡೆ ಉದಾಹರಣೆ. ದುಂಬೇ ಕೋಟಿ-ಚೆನ್ನೆಯೆರ್‍ನ್ ತೂಂಟ ಆವಾಂತಿನ ಬುದ್ಯಂತಗ್ ಈ ಕಂಡತ ಬೆನ್ನಿ ಒಂಜಿ ಹೇತುವಾಪುಂಡು. ಜೋಕುಲು ಕಂಡೊಗು ಪೋನಾಗನೇ ಮಾನ ಮುಚ್ಚರೋ ಆಪುಂಡು ಬುದ್ಯಂತಗ್. ಅಂಚನೆ ಬೆನ್ನಿಟ್‍ಲಾ ಒಂಜಿ ಪಂತ್ತೊ ಸುರುವಾಪುಂಡು. ಆಂಟ ಈ ಪಂತ್ತೊಟು ಕೋಟಿ-ಚೆನ್ನೆಯೆರ್‍ನ ಕೈಯೇ ಮೇಲಾತಿಪುಂಡು. ‘ಜೋಕುಲು ಕೋಡಿಕೊಳಂಜಿನ್ ಅಡತ್ತೊಂದಿಪ್ಪುನಾಗ ಬುದ್ಯಂತೆ ಕನ್ನೆಟಿ ಕಂಬಳೊನ್ ಅಡಪ್ಪಾಪೆರ್, ಬುದ್ಯಂತಗ್ ಒಂಜಿ ಸಾಲ್ ಅಡತ್ತ್‍ತಾನಾಗ ಜೋಕುಲೆಗ್ ರಡ್ಡ್ ಸಾಲ್ ಅಡತ್ತ್‍ತಾಪುಂಡು. ಇಂಚ ಮಚ್ಚರದ ಪಂತೋ ಬೆನ್ನಿ ಬೆನ್ಪುನೆಟ್ಲಾ ನಡತೋಂತಿಪುಂಡು.

ತುಳುನಾಡ್‍ತ ಬೆನ್ನಿದ ಕಂಡೊಗು ಬಿತ್ತುನೈಕ್ ದಿನೊ ತೂಪಿನ, ಐಕಾತ್ ಬಲ್ಮೆತಾಡೆಗ್ ಪೋಪಿನ ಕ್ರಮೊ ಪುರಾಕ್‍ಟೇ ನಡತೋಂತ್ತಿತ್ತ್‍ಡ್. ಇಂಚಿನ ದಿನೊ ತೋಪಿನ ವಿಷಯೊಟು ಮಚ್ಚರೊಲಾ ಇತ್ತಂಡ್‍ಂದ್ ಈ ದುಂಬುದ ಪಾಡ್ದನದ ಭಾಗೊ ಪನ್ಪುಂಡು ‘ಕಂಡೊ ಕೋರಿಗ್ ದಿನಮಾನ್ಯ ಕೇನ್ಯಾರೆ ಪೋವೊಡೂಂದ್ ಮನತಾನಿ ಮೂಡಲ ಪೊರ್ತುಗ್ ಲಕ್ಯೇರೆ ಬುದ್ಯಂತೆ, ಕಂಡತ ಬರಿಯೇ ಪುಣಿಟ್ಟೆ ಪೋಪೆರ್ ಬುದ್ಯಂತೆ, ಕೋಡಿ ಕೊಳಂಜಿತ ಪುಣಿ ಕೆತ್ತೊಂದು, ಪೂಜೊಂದು ಉಳ್ಳೇರ್ ಜೋಕುಲು. ಒಂಚಿ ಪಿದಾಡ್ಯಾರ್‍ಯೇ ಬುದ್ಯಂತೆರೇಂದ್ ಕೇಣ್‍ವೇರ್ ಜೋಕುಲು. ಕನ್ನೇಟಿ ಕಂಬಳಗ್ ದಿನಮಾನ್ಯ ಕೇನ್ಯರೆ ಬಲ್ಯಾಯ ಮಗನಾಡೆಗ್ ಪಿದಾಡ್ಯೇಯೆ ಯಾನ್‍ಂದ್ ಪನ್ಪೆರ್ ಬುದ್ಯಂತೆ. ಈರೆನ ಕನ್ನೇಟಿ ಕಂಬಳದ ದಿನಮಾನ್ಯ ಕೇನಾಗ ಬುದ್ಯಂತೆರೇ ಎಂಕುಲೆನ ಕೋಡಿಕೊಳೆಂಜಿಗ್‍ಲಾ ದಿನಮಾನ್ಯೊ ಕೇನೋಂದ್ ಬರುವರೊಂದ್’ ಕೇನ್ಪೆರ್ ಕೋಟಿ-ಚೆನ್ನೆಯೆರ್. ಐಕ್ ಬುದ್ಯಂತೆ ಒತ್ತೆನಾಂಟಲಾ, ಆಯೆ ಮಲ್ಪಿನ ಸೀತ್ರಿ ಬುದ್ದಿನ್ ತೂಯೆರೆ ಮೆಗ್ಯೆ ಚೆನ್ನಯೆ ಬುದ್ಯಂತನ ಪಿರಾವೇ ಮರೆ ಮರೆನೇ ಪೋಪೆ. ಅವುಲು ಬಲ್ಯಾಯೆ ರಡ್ಡ್ ಕೋರಿಗ್‍ಲಾ ಒಂಜೇ ದಿನೊ ಪನ್ಪೆ. ಬುದ್ಯಂತೆ ಅಯಿನ್ ತಿರ್ಗಾತ್ ಅಂಗಾರೆ ಬುದ್ಯಂತನ ಕಂಡೊತ ಕೋರಿಂದ್‍ಲಾ, ಬುಧವಾರ ಕೋಟಿ-ಚೆನ್ನಯೆರ್‍ನ ಕಂಡತ ಕೋರಿಂದ್‍ಲಾ ಪನ್ಪೆ. ಅಯಿನ್ ತೆರಿನ ಕೋಟಿ-ಚೆನ್ನಯೆರ್ ಅಂಗಾರೆತಾನಿಯೇ ಕೋಡಿಕೊಳಂಜಿತ ಕೋರಿ ಮಲ್ಪುವೆರ್. ಉಂದು ಬುದ್ಯಂತನ ಕೋಪ ಹೆಚ್ಚಾಯೆರೆ ಕಾರಣ ಆಪುಂಡು. ಬುದ್ಯಂತೆ ಕೋಪೊಟು ಬಿದೆ ನೀರ್ ಕಟ್‍ನ ಜೋಕುಲೆನ ಕಂಡೊಗು ನೀರ್ ಬುಡ್ಪೆ. ಇಡೇ ಕಂಡೊನೇ ಕಡಲ್‍ತ ಲೆಕ್ಕೊ ಮಾಲ್ತ್ ದೀಪೆ. ಉಂದುವೇ ಬುದ್ಯಂತನ್ ಕಡ್ತ್ ಕೆರ್ತ್ ಕಡಿ ಕಟ್ಟುನಾಡೆಗ್ ಮುಟ್ಟ ಪೋಪುಂಡು. ಇಂಚ ಇಡೀ ಕಂಡೊದ ಬೆನ್ನಿ ಬಲ್ಲಾಳನ ಮಂತ್ರಿನ ಅವಸಾನೊಗುಲಾ ಕಾರಣ ಆಪುಂಡು.

ಪಡುಮಲೆಡ್ದ್ ಎಣ್ಮೂರುಗ್ ಬತ್ತಿನ ಕೋಟಿ-ಚೆನ್ನಯೆರ್ ಅವುಲ್‍ಲಾ ಕಂಡೊ ಬೆನ್ನಿ ಮಲ್ಪುವೆರ್. ಕೋಟಿ-ಚೆನ್ನಯ ಪಾಡ್ದನೊಟು ಬಲ್ಲಾಳೆರೆನ ರಾಜಕೀಯ ಮೇಲಾಟೊ ಬೊಕ್ಕ ಬೆನ್ನಿತ ಬೇಲೆನೇ ಮುಖ್ಯ ಭಾಗೊ. ಅಯಿಟ್ಲಾ ಬೆನ್ನಿಗಾತ್ ಕೋಟಿ-ಚೆನ್ನಯೆರ್ ಮಲ್ತಿನ ಬೇಲೆತ ವಿವರಣೆ ಪೊರ್ಲುಟು ಮೂಡ್‍ತ್ ಬತ್ತ್‍ಂಡ್. ಅಂಚನೇ ತುಳುನಾಡ್‍ದ ಬೆನ್ನಿದ ಮಸ್ತ್ ವಿಷಯೊಲು ಈ ಪಾಡ್ದನೊಟು ಬರ್ಪುಂಡು.

ಕೋಟಿ-ಚೆನ್ನಯೆರ್‍ನ ಲೆಕ್ಕೊನೇ ತುಳುನಾಡ್ದ ಬುಕ್ಕೊಂಜಿ ಜನಪದ ಮಹಾಕಾವ್ಯದ ಸಾಲೆಗ್ ಸೇರ್‍ನವು ಸಿರಿ. ಈ ಪಾಡ್ದನೊಲೆಟ್ಲಾ ಬೆನ್ನಿದ ವಿಚಾರ ಮಸ್ತ್ ಬರ್ಪುಂಡು. ಸಿರಿನ್ ತಾಂಕಿನ ಬೆರ್ಮ ಆಳ್ವೆ ಮಲ್ಲ ಬೆನ್ನಿದಾಯೆ. ಸಾರೊ ಮುಡಿ ಅರಿತ ಕಂಡೊ ಅಯನವು. ಆಂಟಾ ಜೋಕುಲಿಜ್ಜಿಂದ್ ಪನ್ಪಿನ ಬೇಜಾರೋಟ್ ‘ಎನ್ನ ಸಾರೊ ಮುಡಿ ಅರಿತ ಹುಟ್ಟೋಳಿ ಎನ್ನಡ್‍ದೇ ಆದ್, ಎನ್ನಡ್‍ದೇ ಪೋಪಿಲೆಕ್ಕೊ ಆಂಡ್‍ಂದ್ ಬೆರ್ಮ ಆಳ್ವರ್ ದುಃಖಿತರಾಪೆರ್. ಆರೆನ ಸಾಂಕಿ ಮಗಳೇ ಸಿರಿ. ಸಿರಿನ ದುಂಬುತ ಕಂಡಾನಿ ಬಸರೂರು ಬತ್ತಕೇರಿ ಕಾಂತುಪೂಂಜೆಲಾ ಒರಿ ಸಾಗುವಳಿದಾಯೆ. ಆಂಟಾ ಆಯೆ ಬೇಲೆಟ್ ಸೋಮಾರಿ, ಕೆಲಸ ಮಾಲ್ಪಂದಿನ ಸಾಲ್‍ಗ್ ಸೇರ್‍ನಯೆ. ಅಂಚಾತ್ ಬತ್ತಕೇರಿ ಅರಮನೆ ದಿವಾಳಿ ಆತ್ ಪೊಪುಂಡ್. ಅಯನ ಪೋಲಿ ಬುದ್ದಿಡ್ತಾತ್ ಬಸರೂರು ಬತ್ತಕೇರಿ ಇಲ್ ಅವನತಿಯಾಪುಂಡ್. ಅಂಚನೇ ಸಿರಿನ ರಡ್ಡನೇ ಕಂಡನಿಲಾ ಮಾಮಲ್ಲ ಬಾರಗೆದಾಯೆ. ಇಂಚ ಸಿರಿ ಪಾಡ್ದನದ ಅಲ್ಲಲ್ ಬೆನ್ನಿದ ಚಿತ್ರಣೊ ತೋಜ್‍ದ್ ಬರ್ಪುಂಡು.

ಸಿರಿತ ಲೆಕ್ಕೊನೆ ತುಳುನಾಡ್‍ಟ್ ಪುದಾರ್ ಪೋಯಿನ ನನೊಂಜಿ ಪಾಡ್ದನೊ ಬಲಿಯೇಂದ್ರೆ. ಈ ಪಾಡ್ದನ ತುಳುನಾಡ್‍ದ ಬೆನ್ನಿ ಬದ್‍ಕ್‍ದ ಪೂರ್ಣ ಪರಿಚಯ ಮಲ್ತ ಕೊರ್ಪನಂಚಿನ ಪಾಡ್ದನ. ಬಲಿಯೇಂದ್ರೆನೇ ಸ್ವತಾ ಬೆನ್ನಿ ಬೆನ್ಪುನ ವರ್ಣನೆ ಈ ಪಾಡ್ದನದ ಉದ್ದೊಗುಲಾ ತಿಕ್ಕೊಂತುಂಡು. ಬಲಿಯೇಂದ್ರನ್ ಒರಿ ರಾಜೆಂದ್ ಅತ್ತಾಂಡ ಅರಸೂಂದ್ ಓಳುಲಾ ಪಣಾಂತೆ ಅಯೆ ಒರಿ ಭೂಮಿತ ಮಗೇಂದು ಲೆಪ್ಪುನವೇ ಬೇಸಾಯ ಸಂಸ್ಕøತಿತ ಒಂಜಿ ಪ್ರತೀಕೊ, ಬಲಿಯೇಂದ್ರ ಪಾಡ್ದನೊಟು ಬೆನ್ನಿ ಬೆನ್ಪುನ ವಿಷಯದ ಬಗ್ಗೆ ನೇರ ವಿವರಣೆಲು ಇಜ್ಜಾಂಟಲಾ ಬೆನ್ನಿ ಸಂಸ್ಕøತಿ ಎತ್ ಗಟ್ಟಿಯಾತ್ ಇತ್ತ್‍ಂಡ್‍ಂದ್ ಪನ್ಪಿನ ಮಸ್ತ್ ವಿವರಣೆಲು ತಿಕ್ಕೊಂದುಂಡು. ‘ಆನಿ ಆನೀಯೆ ಬಿತ್ತ್‍ದ್ ಆನಿ ಆನೀಯೇ ಕೊಯೊಂದಿತ್ತಿನಾಯೆ ಬಲೀಯೆಂದ್ರೆ’. ವೈಜ್ಞಾನಿಕವಾದ್ ಈ ವಿವರಣೆಗ್ ಅರ್ಥೊ ಇಜ್ಜಾಂಡಲಾ, ಇನಿತ ಪಾರುನ ಬದುಕ್‍ಡ್ ಉಂದೆಕ್ಕ್ ಅರ್ಥೊ ತಿಕ್ಕೊಂತುಂಡು. ದುಂಬು ಆಜಿ ತಿಂಗೊಳು ಮಾಲ್ತೋಂತಿತ್ತಿನ ಬೆನ್ನಿ, ಇನಿ ಒಂಜಿ ತಿಂಗೊಳುಡು ಕೈಕ್ ತಿಕ್ಕೊಂತುಂಡು. ಅಂಚಾದ್ ಬಲೀಯೆಂದ್ರೇ ಆ ಕಾಲೊಡು ಮೂಜಿ ಬುಳೆಡ್ತ್‍ಲಾ ಹೆಚ್ಚ ಬುಳೆಪ್ಪಾವೊಂದಿತ್ತೇಂದ್ ಪನ್ಪಿನ ಒಳಾರ್ಥೊವೊಂಜಿ ಮೂಲು ತೋಜೊಂತುಂಡು. ತುಳುನಾಡ್‍ಟ್ ಬಲಿಯೇಂದ್ರೆ ಭೂತ ಅತ್ತ್, ಆಯಗ್ ಕೋಲ, ನೇಮೋ ಇಂಚಿತ್ತಿ ವಾ ಕ್ರಿಯಾಚರಣೆಲೂ ಇಜ್ಜಿ. ಆಂಟ ವರ್ಷಗೊರೊ ಅಯನ್ ಕಾಲ್ಪನಿಕವಾದ್ ತುಳುನಾಡ್‍ಟ್ ಬೆನ್ನಿ ಬೆನ್ಪುನಕುಲು ಲೆತ್ತ್‍ದ್ ಮಾನಾದಿಗ್ ಕೊರ್ಪಿನ ಸಂಪ್ರದಾಯೊ ಇನಿಲಾ ಉಂಡು. ತುಳುನಾಡ್‍ಟ್ ಆಯಿನ ವರ್ಗ ಸಂಘರ್ಷೊಟು ಬಲಿಯೇಂದ್ರೆ ವಂಚನೆಗ್ ಬಲಿಯಾಯೆ. ಆಂಟ ಆಯನ್ ಮದಪೆರಾವಂತಿನ ಅಯನ ಸಾಗುವಳಿದ ಸಮುದಾಯೊ ಅಯನ್ ವರ್ಷಗೊರೊ ಲೆತ್ತ್‍ದ್, ಮಿತ್ತ್‍ವರ್ಗೊಗು ಒಂಜಿ ರೀತಿದ ಪ್ರತಿಭಟನೆ ಸೂಜಿಸಾಪುನೇನ್ ಈ ಕ್ರಿಯಾಚರಣೆಲೆಟ್ ತೂಯೆರೆ ಸಾಧ್ಯವುಂಡು. ಅಂಚಾತ್ ತುಳುನಾಡ್‍ದ ಬೆನ್ನಿದ ಉತ್ಪತ್ತಿ ತಿಕ್ಕುನ ಕಾಲೊ ತುಳುವೆರೆಗ್ ಪರ್ಬೊ. ಆ ಪರ್ಬೊಗು ಬಲಿಯೇಂದ್ರೆ ಬರಪಿನ ಸಂಕೇತೊಲಾ ಅಂದ್.

ಕೋಟೆದ ಬಬ್ಬು ಬಾರಗೆಂದ್ ಪನ್ಪಿನ ನನೊಂಜಿ ಪಾಡ್ದನಟ್ಲಾ ಬೆನ್ನಿದ ಚಿತ್ರಣೊ ಸಾಮಾನ್ಯವಾದುಂಡು. ಮೂಲು ಬಾರಗೇಂದ್ ಪನ್ಪಿನ ಪುದಾರೇ ಸಾಗುವಳಿತಾಯನ ಪುದರ್. ಬಬ್ಬು ಮಾಮ್ಮಲ್ಲ ಸಾಗುವಳಿತಾಯೆಂದ್ ಪನ್ಪಿನ ವರ್ಣನೆ ಈ ಪಾಡ್ದನೊದ ಸುರುಕು ತಿಕ್ಕುಂಡು. ‘ನೇರಡೆ ಕಾಂಡೆ ಲಕ್ಯೇರ್ ಕೋಟೆದ ಬಬ್ಬು ಬಾರಗೆ, ಕೊಟ್ಟು ದೀಪಿ ಕೊಟ್ಟರೊಗು ಪೋಯೆರ್, ಬಸರೂರು ಪನ್ನೆ ಕೊಟ್ಟು ದೇತ್ತರ್, ಬಲತ ಪುಗೇಲ್‍ಡ್ ದೀಯೆರ್, ಸಾರಮುಡಿ ಕಂಡದ ಗಡಿನೀರ್ ಜಪ್ಪಿಯೆರ್, ಪೀರ್ಕಿನ ನೀರ್ ಸೀರ್ಕವೊಂದು ಬತ್ತೆರ್, ಸಿರ್ಕನ ನೀರ್‍ನ್ ಎರ್ಕವೊಂದು ಬತ್ತೆರ್, ಪರಕಡಿ ಮುಚ್ಚಿಯೆರ್, ಪೊಸಕಡಿ ದೆತ್ತೇರ್’, ಇಂಚ ಪಾಡ್ದನೊಟು ಅಲ್ಲಲ್ ವಿವರಣೆ ಮಸ್ತ್ ಬರ್ಪುಂಡು. ಬೆನ್ನಿದಾಯೆ ಏತೇ ಮಲ್ಲಯೇ ಆಂಡಾಲ ಆಯನ ನಿತ್ಯ ಕೆಲಸೊಲು ಸುರು ಆಪಿನಾನೇ ಕಂಡತ ಪುಣಿಟ್‍ಂಡ್ ಪನ್ಪಿನ ಸತ್ಯ ಈ ಪಾಡ್ದನೊಟು ತೆರಿದ್ ಬರ್ಪುಂಡು. ಪಾಡ್ದನೊತ ದುಂಬುತ ಭಾಗೊಟ್ ಬಬ್ಬು ಬಾರಗೆಗ್ ತಿಕ್ಕಿನ ದೇಶಾಂತರಿ ಬಾಲೆನ್ ಕಜ್ಜೂರ ಬೂಡ್‍ಗ್ ಕೊನೊಪೆರ್ ‘ಬಾರೆಡಪಿ ಬರೆಕಲಗ್ ಕೊನತೆರ್, ಆತನ ಪೊರ್ತುಗು ಆರೆನ ಮದಿಮಾಲ್À ಸಿರಿಕೊಂಡೆ ವುಲ್ಲಾಲ್ ಉಳಾಯಿ. ಬಾರಿ ಒಂಜಿ ಮೋಕೆ ಕೊಂಡಾಟೊಡು ಸಾಕೊಂಡುಂದು ಪನ್ಪರ್ ಬಾರಗೆ, ಬಾರೆಡ್‍ಪಿ ಬರೆಕ¯ಟ್ ಬೂರು ತೊಟ್ಟಿಲ್ ಪಾಡ್ದ ‘ಬಾಲೆ ಕಚ್ಚೂರ ಮಾಲದಿ’ಂದ್ ಪುದರ್ ದೀಯೆರ್’ ಇಂಚ ಈ ಪಾಡ್ದನೊಟು ವಿವರಣೆ ಉಂಡು. ಪಂಡ ಬಾರೆಡ್‍ಪಿ ಬರಕಲಟೇ ಬಾಲೆಗ್ ತೊಟ್ಟಿಲ್ ಕಟ್ಟುನ ಸಂಪ್ರದಾಯ ಇತ್ತ್‍ಂಡ್‍ಂದ್ ಈ ಪಾಡ್ದನೊ ಪನ್ಪಂಡು. ಈ ಪಾಡ್ದನೊತ ಲೆಕ್ಕೊನೇ ಬುಕ್ಕೊಂಜಿ ಪಾಡ್ದನ ಭಾಮಕುಮಾರಿ ಸಂದಿ. ಪಂಜುರ್ಲಿ ಪಾಡ್ದನದಲೆಕ್ಕೊ ಮೂಲುಲಾ ಈಸ್ವರೆ ಒರಿ ಮಲ್ಲಾ ಸಾಗೊಳಿದಯೆ. ಅಯನ ಅರಮನೆ, ಬೂಡು, ಮಾಡ, ಪಿತ್ತೆಲ್, ಕಿದೆ, ಮೂಲದ ಮುಂಡಾಲೆ, ಇಂಚ ಮಸ್ತ್ ವರ್ಣನೆ ಈ ಪಾಡ್ದನೊಟು ತಿಕ್ಕೋಂದುಂಡು. ಈಸ್ವರೆ ಒರಿ ದೇವೆರ್‍ಂದ್ ಪನ್ಪಿನೈಡ್ಡ್‍ಲಾ ಅಯೆ ಒರಿ ಜನಸಾಮನ್ಯೆ, ಬೆನ್ನಿ ಬೆನ್ಪುನಕುಲೆನ ನಡೂಟು ಕಾಲ ಕರಿಪುನಂಚಿನ ಒರಿ ಸಾದಾಸೀದ ನರಮಾನಿ. ಅಂಚ ಆಯೆ ಕಟ್ಟಿನ ಅಟ್ಟೆಮರ ಆಕಾಸೊದ ಎತ್ತರೋ, ದೆಪ್ಪನ ನೀರ್ ಪಾತಾಳೊತ ಪನಿನೀರ್. ಇಂಚಿನ ಒಂಜಿ ನೀರ್‍ದ ವ್ಯವಸ್ಥೆ ಈಸ್ವರನವು ಆತಿತ್ತ್‍ಂಡ್‍ಂದ್ ಪಾಡ್ದನ ಪನ್ಪುಂಡು.

ಆಂಚನೆ ಪರತಿ ಮಂಞಣೆ ಪಾಡ್ದನೊ ನನಲಾ ವಿಚಿತ್ರವಾಯಿನವು. ಬೂಡುಟು ಭೂತ ಕಟ್ಟುನ ಪರವನ ಪೊರ್ಲುತ ಬುಡೆತಿನ ಮಿತ್ತ್ ಬಲ್ಲಾಳಗ್ ಮೋಕೆ ಪುಟ್ಟುಡು, ಐಡ್ದಾದ್ ತನ್ನ ಬದುಕ್, ಬಂಗಾರೊ ಕೊಪ್ಪರಿಗೆ ಮಾಂತೆನ್ಲಾ ಕಳೆತ್, ಅಕೇರಿಗ್ ಪರತೀಲಾ ತಿಕ್ಕಂತೆ ಕಾಟೊಗ್ ಬೂರುತ್ ಜುವೊ ದೊತ್ತೋನುನಂಚಿನ ಕಥೆ ಈ ಪಾಡ್ದನೊ. ಪರತಿಗಾತ್ ಬಲ್ಲಾಳೆ ಸಾರ ಮುಡಿ ಅರಿತ ಕಂಡೊನೆ ಕೊರಿಯರೆ ಪೋಪೆ. ತಾನೇ ಕೆರ್ನ ಪರವನ ಕಾಟೊನು ಬಾಕಿತಿಮಾರ್ ಕಂಡೊಟೇ ಕೂಟುಪೇ. ಇಂಚ ಸಾಮಾಜಿಕ ಸ್ಥಾನಮಾನೊನ್ ಪರತಿಗ್ ಕೊರಿಯರೆ ಬಲ್ಲಾಳೆ ದುಂಬು ಪೋಪೆ. ಆಂಟ ಬಾರಿ ಉಪಯೋಟು ಬಲ್ಲಾಳನ ಸಂಪತ್ತ್‍ನ್ ಪರವನ ಕಾಟೊಗ್ ಪಾಡ್ಪಾಪುನ ಪರತಿ, ಅಕೇರಿಗ್ ತಾನೇ ಪರವನ ಕಾಟೊಗ್ ಲಾಗಿತ್ ಸೈಪಲ್. ಸಂಪತ್ತ್‍ಲಾ, ಪರತಿನ್‍ಲಾ ಕಳೆಯೋನ ಬಲ್ಲಾಳೆ ಅಕೇರಿಗ್ ಅವುವೇ ಕಾಟೊಗ್ ಲಾಗಿತ್ ಜುವೊ ದೆತೊನ್ಪೆ. ಬೆನ್ನಿದ ಬೇಲೆ ಬಲ್ಲಾಳನ ಬೊಕ್ಕೊ ಪರತಿನ ವಂಶ ನಾಶಗ್‍ಲಾ ಹೇತು ಆಪುಂಡು.

ಈ ಪಾಡ್ದನೊಳು ಅತ್ತಾಂತೆ ಅವಸರದ ಮೆನ್ನೊಡಿ , ಕೊಲ್ಲೂರು ಮೂಕಾಂಬಿ ಈ ಪಾಡ್ದನೊಲೆಟ್ಲಾ ಬೆನ್ನಿ ಬೆನ್ಪುನ ಪಾತ್ರೊಳು ಹೆಚ್ಚಾತ್ ತೋಜಿತ್ ಬರ್ಪುಂಡು. ಕೊಲ್ಲೂರು ಮುಕಾಂಬಿ ಪಾಡ್ದನೊಟು ಬರ್ಪಿನ ಕಡಂಬರ ಮಯ್ಯನ ದರ್ಬಾರ್‍ನ್ ತೂನಾಗ ಆಯೆ ಬಾರಿ ಮಲ್ಲ ಬೆನ್ನಿತ್ತಾಯೆಂದ್ ಎನ್ಯರಾಪುಂಡು. ಬಾಕಿತಿಮಾರ್ ಕಂಡೊ, ಸಾರ ಮುಡಿ ಕಂಡೊ, ಆಯನ ದೌಲತ್, ಪಣಾವು, ಇಂಚಿತ್ತಿ ಮಸ್ತ್ ವಿಷಯೊಳ್ ಈ ಪಾಡ್ದನೊಳೆಟ್ ಉಂಡು. ಉಂದು ಅತ್ತಾಂತೆ ತುಳುನಾಡ್‍ತ ಬೇತೆ ಬೇತೆ ಪಾಡ್ದನೊಲೆಟ್ ಬೆನ್ನಿದ ವಿಚಾರೊ ಬತ್‍ದೇ ಉಪ್ಪುಂಡು. , ಜುಮಾದಿ, ಪಿಲಿಚಾಮುಂಡಿ, ಜಾರುದಾಯ ಇಂಚ ಆರಾಧನಾ ಪ್ರಧಾನವಾಯಿನ ಪಾಡ್ದನೊಲೆಟ್ಲಾ ಬೆನ್ನಿದ ವಿವರಣೆ, ವರ್ಣನೆ, ರೀತಿ ನೀತಿ, ರಿವಾಜುಲೆನ ತೂಯೆರೆ ಸಾಧ್ಯವುಂಡು. ಒಂಜಿ ಕಾಲೊಟು ತುಳುನಾಡ್‍ಟ್ ಇತ್ತಿನ ಪ್ರಧಾನ ಕಸುಬು ಬೆನ್ನಿ ಆಯನೆಡ್ದಾರೋ, ಅಯಿನ್ ಸೇರ್ಸಾವಾಂದೆ ಪಾಡ್ದನ ಕಟ್ಯೆರೆ ಸಾಧ್ಯ ಇಜ್ಜಿಂದ್ ಪನ್ಪಿನ ಸತ್ಯೊ ಅಯಿನ್ ಸಂಗ್ರಹಣೆ ಮಾಲ್ಪುನ ಮಾತೆರೆಗ್ಲಾ ತೆರಿದಿಪ್ಪುಂಡು. ಅಂಚಾದ್ ಮಾಂತ ಪಾಡ್ದನೊಲೆಟ್ಲಾ ಒಂಜತ್ತ್ ಒಂಜಿ ವಿದೊಟು ಬೆನ್ನಿದ ವಿವರಣೆ ಬತ್ತಿನೈನ್ ತೂಯೆರೆ ಸಾಧ್ಯವುಂಡು.

ಡಾ. ಸುಂದರ ಕೇನಾಜೆ