ತುಳು ಸಂಸ್ಕೃತಿ

ತುಳು ಜಾನಪದ ಸಂಸ್ಕøತಿ ದೊಟ್ಟುಗು ತುಳುವೆರೆ ಬದ್‍ಕ್

ಇತ್ತೆತ ತುಳುವೆರೆ ಬದುಕ್ ಬೊಕ್ಕ ಪುರಾಕ್‍ದ ತುಳುನಾಡ್‍ದ ಸಂಸ್ಕೃತಿ ಈ ರಡ್ಡೆನ್ ಬೇತೆಬೇತೆ ಮಲ್ತ್‍ತ್ ತೂಪಿನಂಜಿನ ಪರಿಸ್ಥಿತಿ ಇನಿ ನಮ ದುಂಬು ತೋಜೋಂತುಂಡು. ಆಧುನಿಕ ಜಗತ್ತ್‍ದ ಗಾಳಿ ಸೋಂಕ್‍ತ್ ತುಳುನಾಡ್‍ದ ಜನಕುಲೆನ ಬದಕ್‍ಟ್ ಆಯಿನ ಬದಲಾವಣೆ, ಅವು ತುಳು ಸಂಸ್ಕøತಿತ ಬುಡೊಕ್ಕು ಪಾಡಿನ ಗೊಡಾರಿ ಪೆಟ್ಟ್‍ದ ಲೆಕ್ಕೋ ತೋಜೋಂತುಂಡು. ಜಗತ್ತ್‍ದ ಬೇತೆಬೇತೆ ಪ್ರದೇಶೊಟು ಬದುಕುನ ಜನಕುಲು, ಅಕುಲೆನ ಆಚಾರ-ವಿಚಾರೊ, ನಡೆ-ನುಡಿ, ಬೊಕೊ ಅಕುಲೆನ ವೃತ್ತಿ ಸಂಬಂಧವಾಯಿನ ಬದ್ಕ್‍ತ ಕ್ರಮೊ ಇಂಚಿತ್ತಿ ಅಂಶೊಲೆನ್ ದೀವೋಂತು ಒಂಜಿ ಸಂಸ್ಕøತಿನ್ ಕಟ್ಯೆರೆ ತುಯಿನಕುಲೆಟ್ ತುಳುವೆರ್‍ಲಾ ಪ್ರಮುಖೆರ್. ಪಂಡ ಕಡಲ್‍ತ ಬಲತ್ತ ಮೈ ಬೊಕ್ಕೊ ಗಟ್ಟತ ಎಡತ್ತ ಮೈ ಈ ನಿರ್ದಿಷ್ಟ ಪ್ರದೇಶೊಟಿತ್ತಿನ ಜನಕುಲೆನ ಬದ್ಕ್ ಬಾರಿ ಪರಾಕ್‍ಡ್ದ್ ವ್ಯವಸ್ಥಿತವಾತ್ ಬುಳೆತ್ತ್ ಬತ್ತ್‍ತ್ತ್‍ಂಡ್, ಆ ಬದ್‍ಕ್ ಜಗತ್ತ್‍ತ ಒವುವೇ ನಾಗರೀಕತೆತ ಚರಿತ್ರೆಗ್‍ಲಾ ಕಡಮೆ ಇಜ್ಜಾಂತಿಲೆಕ್ಕೊ ಬುಳೆಯಿನವುಲಾ ಸತ್ಯೊ. ಅವೇ ತುಳು ಸಂಸ್ಕøತಿತ ಬದ್‍ಕ್. ಏತೋ ಸಾವಿರೊ ವರ್ಸೊಡ್ದ್‍ಂಚಿ ನಡತ್ತ್ ಬತ್ತಿನ ಬಾರಿ ಪರಾಕ್‍ದ ಸಂಸ್ಕøತಿ ಈ ತುಳು ಸಂಸ್ಕøತಿ. ತುಳುಂದ್ ಪನ್ಪಿನವು ಒಂಜಿ ಬದ್‍ಕ್‍ದ ಕ್ರಮೊ. ರಡ್ಡ್ ಮೈ ಬುಡ್ತು, ರಡ್ಡ್ ಮೈ ಬೇಲಿಯಾತ್ ಉಂತುದು ಸ್ವಿಕಾರೊನ್‍ಲಾ ರಕ್ಷಣೆನ್‍ಲಾ ಇಂಚ ರಡ್ಡೆನ್ಲಾ ಪಡೆಯೋತ್ ಬತ್ತಿನ ಪ್ರದೇಶೊ ತುಳುನಾಡ್. ಮೂಡಾಯಿ-ಪಡ್ಡೇಯಿ ಗಟ್ಟೊ ಬೊಕ್ಕೊ ಕಡಲ್‍ತ ರಕ್ಷಣೆ, ತೆನಕಾಯಿ-ಬಡೆಕಾಯಿ ಕನ್ನಡ ಬೊಕ್ಕ ಮಲೆಯಾಳತ ಲೆಪ್ಪು, ಉಂದು ತುಳುನಾಡ್‍ತ ವಿಶೇಸೊ. ಅಂಚನೆ ತುಳು ಸಂಸ್ಕøತಿತ ಕಂಮ್ಮೆನೊತ ಗುಟ್ಟು.

ಒಂಜಿ ಊರುದ ಸಂಸ್ಕøತಿ ಆ ಊರುದ ಭಾಸೆತ ಮಿತ್ತ್ ಉಂತ್‍ತ್ ಉಪ್ಪುಡೂಂದು ಪನ್ಪಿನ ಸಂಸ್ಕøತಿ ಚಿಂತೆಕೆರ್‍ನ ಪಾತೆರೊನು ಇನಿತ ಕಾಲೊಗಟ್ಟೊಟು ಮರುವಿಮರ್ಶೆ ಮಲ್ಪೊಡಾಯಿನ ಅಗತ್ಯೊ ಉಂಡು. ಒಂಜಿ ಭಾಷೆದ ಮಿತ್ತ್ ಮಾತ್ರೊ ಸಂಸ್ಕøತಿ ಬದುಕುಡೂಂದ್ ಪಂಡ ಇನಿ ತುಳು ಭಾಸೆನ್ ಪಾತೆರುನಾಕುಲೆನ ಸಂಖ್ಯೆ ಜಾಸ್ತಿನೇ ಇತ್ತ್‍ಂಡಲಾ ತುಳು ಸಂಸ್ಕøತಿದ ಬದ್‍ಕ್ ಮಾತ್ರ ನಮ ದುಂಬು ಇಜ್ಜಿ. ಅಂಚಾತ್ ತುಳು ಸಂಸ್ಕøತಿ ಒಂಜಿ ನಿರ್ದಿಷ್ಟವಾಯಿನ ಬಾಸೆತ ಬದಲ್ ವೃತ್ತಿದ ಹಿನ್ನಲೆಟ್ ನಿರ್ಧಾರ ಆತಿತ್ತ್‍ಂಡ್‍ಂದ್ ಇತ್ತೆ ತೆರಿದ್ ಬರ್‍ಪುಂಡು. ಪಂಟ ಏಪೊ ತುಳುನಾಡ್‍ಟ್ ಬೆನ್ನಿದ ಬೇಲೆ ಕೈದ್ ಆಂಡೋ ಆನಿ ಬಾಸೆ ಮಾತ್ರೊ ನಮ ನಡುಟು ಒರೀಂಡ್, ಬಾಕಿತ್ತಿ ಆಚಾರೊ-ವಿಚಾರೊ ಬೊಕ್ಕ ನರಮಾನಿನ ನಡೆಟ್ ಬದಲಾವಣೆ ಆಂಡ್. ಮಾತ್ರೊ ಅತ್ತಾಂದೆ ಬೇತೆಬೇತೆ ಸಂಸ್ಕøತಿತ ಅನುಕರಣೆಲಾ ಆಯೆರೆ ಸುರುವಾಂಡ್. ಇನಿ ಕಂಡೊ ಇಜ್ಜಿ ಅಂಚಾತ್ ಅರಿಬಾರ್ ಬುಳೆಪುನ ಬೆನ್ನಿಲಾ ಇಜ್ಜಿ. ಈ ಕೆಲಸೊ ಇಜ್ಜಾಂದಿನೇಡ್ದಾರೊ ತುಳುವೆರ್‍ನ ಜೀವನ ಕ್ರಮಟು ಬಾರೀ ಮಲ್ಲ ಬದಲಾವಣೆಲಾ ತೋಜ್ಯರೆ ಸುರುವಾಂಡ್. ಕಂಡದ ಬೆನ್ನಿ ಇಪ್ಪುನ ಕಾಲೊಟು, ಪುಳ್ಳೆಕಾಂಡೆ ಲಕ್ಕತ್ ಕಂಡದ ಬಗ್ಗೆನೇ ಆಲೋಚನೆ ಮಲ್ತೋಂದಿತ್ತಿನ, ಆ ಆಲೋಚನೆನ್ ಕಾರ್ಯರೂಪೊಗು ಕೊಂಡ್ರುನ, ಅಯಿಕ್‍ಬೋಡಾತ್ ಸಂಘಟಿತ ಕೆಲಸೊ ಮಲ್ಪಿನ ಒಂಜಿ ಕ್ರಮೊ ನಡತ್ ಬರೋಂತ್ತಿತ್ತ್‍ಂತಡ್. ಇನಿ ಅಂಚಿತ್ತಿ ಆಲೋಚನೆಗೆ ಅವಕಾಸೊನೇ ಇಜ್ಜಾತಿನೇಡ್ತಾರೊ ಇನಿತ ಜೀವನ ಕ್ರಮೊನೇ ಬದಲ್ತ್‍ಂಡ್. ಅಂಚ್ಚಾತ್ ಸಂಸ್ಕøತಿತ ಸ್ವರೂಪೊಟ್‍ಲಾ ಬದಲಾವಣೆ ತೋಜೋತುಂಡು. ಉಂದು ತುಳುನಾಡ್‍ದ ಆಚರಣೆ,ಪರ್ಬೊ, ನಂಬಿಕೆ, ನಡವಳಿಕೆ, ಕೂಡ್‍ಕಟ್ಟ್ ಇಂಚಿತ್ತಿ ಅಂಶೊಲೆಟ್ ಹೆಚ್ಚ ತೋಜೊಂತುಂಡು.

ತುಳುನಾಡ್‍ದ ಬೆನ್ನೀಂದ್ ಪಂಡ ಅವೊಂಜಿ ನುಪ್ಪುದ ತಾದಿಂದ್ ಮಾತ್ರೊ ತೆರಿಯರೆ ಬಲ್ಲಿ. ಬದಲಾತ್ ಅವೊಂಜ್ಜಿ ಬದ್‍ಕ್ಕ್‍ದ ತಾದಿಂದ್ ಪನ್ಪಿನ ಸತ್ಯೊನು ತೆರಿಯೊಡು. ಅಂಚಾತ್ ಬೆನ್ನಿನ್ ಬುಡ್ತು ತುಳು ಸಂಸ್ಕøತಿ ಇಜ್ಜೀಂದ್ ಪನ್ಪಿನವು ವಾ ಕಾಲೊಗ್‍ಲಾ ಸರಿ. ಒಂಜಿ ಇರುವತ್ತೈನ್ ವರ್ಸೊಗು ದುಂಬುತ ಜನಕುಲೆನ ದಿನಚರಿ ತೂಂಡ ಅಕುಲು ಪುಳ್ಳೆಕಾಂಡೆ ಲಕ್ಕ್‍ತ್ ಕೆಲಸೊ ಸುರು ಮಲ್ಪಿನವೇ ಕಂಡೊಟು. ನೀರ್‍ಕಟ್ಟುನ, ನೀರ್ ಏರ್ಸಾಪುನ, ಎರುಕ್ಕುಲೆಗ್ ಅರ್ಕಾಂಜಿ ಕೊರ್ಪುನ, ಪಂತಿ ಪಾಡುನ, ಅಡಪ್ಪುನ, ಗೊಬ್ಬರೊ ಪಾಡುನ, ದಾಲಾ ಇಜ್ಜಾಟ ಕಂಡೊಗು ಒಂಜಿ ಸುತ್ತು ಬರ್ಪಿನ- ಇಂಜಿತ್ತಿ ಕೆಲಸೊ ತುಳುವೆರ್‍ನ ದಿನಚರಿ ಆತಿತ್ತ್‍ಂಡ್. ಅಯಿಟ್ ಕಂಡೊ ಇಜ್ಜಾಂತಿನಾಯೆ ಇತ್ತಿನಾಯೆಂದ್ ಪನ್ಪಿನ ಬೇದೊ ಇಜ್ಜಾಂಡ್. ದನಿನ ಕಂಡೊತ ಸುತ್ತು ಬರ್ಪಿನ ಸಹಜ ಸ್ಥಿತಿಲಾ ಇತ್ತ್‍ಡ್. ಅಂಚಾತ್ ಬೆಲೆತ ಮೂಲೊ ಕಂಡೊಟು ಇತ್ತಿನ ಕಾಲೊಡು ತುಳು ಜನಪದೆರ್ ಬೇಲೆಜ್ಜಾಂತಿನಕುಲತ್ತ್. ಇಡೀ ಸಂಸಾರೊ ಏಣೆಲ್, ಸುಗ್ಗಿ, ಕೊಳಕೆ, ಪಟ್ಲಾಂದ್ ಬೇತೆಬೇತೆ ಕಾಲಾನುಸಾರತ ವಿಭಾಗ ಮಲ್ತ್‍ತ್ ಕೆಲಸೊನು ಹಂಚೊಂತ್, ಪಗರೊಗು ಕೆಲಸೊ ಮಲ್ತೊಂದು ಬೇಲೆನ್ ಬದ್ಕ್‍ದ ಅವಿಬಾಜ್ಯವಾದ್ ಮಲ್ತೋಂದು ಬರೋಂದಿತ್ತೇರ್. ಆಂಟ ಬೆನ್ನಿದ ಜಾಗೆಗ್ ಬಜ್ಜೈ,ತಾರಾಯಿ,ರಬ್ಬರ್ ಬತ್ತಿನಾನಿ ಅವೇ ಬೇಲೆ ಆಜಿ ತಿಂಗೊಳುಗು ದತ್ತ್‍ಂಡ್. ಪುಳ್ಳೆಕಾಂಡೆ ಕಡಿಕಟ್ಟುನ ಬದಲ್‍ಗ್ ನೀರ್ ಇತ್ತಿನಾನಿ ಬೇಲೆಂದ್ ಪನ್ಪಿನ ಸ್ಥಿತಿಗ್ ಬತ್ತ್‍ಂಡ್. ಉಂದು ಬೇಲೆ ಮಲ್ಪುನಕುಲೆನ ಬೇಲೆದ ರೀತಿ ನೀತಿನೇ ಬದಲ್ಪಿಯೆರೆ ಕಾರಣ ಆಡ್. ಅಂಜಾತ್ ಇನಿ ಜನಕುಲು ಮಲ್ಪಿನ ಕೆಲಸೊ ಅವು ತುಳು ಸಂಸ್ಕøತಿತ ಭಾಗವಾಯಿನ ಕೆಲಸೊ ಅತ್ತೇ ಅತ್ತ್. ಅವು ಆಧುನಿಕ ವ್ಯವಸ್ಥೆಗ್ ಪೂರಕವಾಯಿನ ಕೆಲಸೊಲು. ಬೆನ್ನಿ ಬೆಂದ್‍ದ್ ನುಪ್ಪು ತಿಕ್ಕೋತ್ತಿತ್ತಿನ ಕೈಕ್ ಇನಿ ಕಾಸ್ ತಿಕ್ಕೋಂದುಂಡು. ನೇರೊ ನುಪ್ಪು ತಿಕ್ಕುನ ಸಂಸ್ಕøತಿ ಜನ್ಯ ತಾದಿನ್ ಬುಡುತ್ ಕಾಸ್ ಪತ್ತ್‍ದ್ ನುಪ್ಪು ನಾಡುನ ಸ್ಥಿತಿಕ್ ಬತ್ತ್‍ತೊ. ಪಂಡ ಕೈಟ್ ಇತ್ತಿನೇನ್ ಬುಡುತ್ ರಾಪುನೈಕ್ ಕೈ ಒಡ್ಡುನೆ ಲಕ್ಕಾಂಡ್. ಪಳ್ಳೆಕಾಡೆ ಲಕ್ಕ್‍ತ್ ಕಂಡೊಗು ಸುತ್ತು ಬರ್‍ಪಿನ ಸುಕೊನು ಏಪೊನೋ ಬುಡುತಾತ್ತ್‍ಂಡ್. ಅಂಚಾದ್ ಹಿರಿಯೆರ್ ಪಂಡಿಕೊರ್ನ ಸ್ವಾವಲಂಬನೆತ ತಾದಿ ಮಣ್ ಪಲಾವೊಂತುಂಡು. ಉಂದು ತುಳುವೇರ್‍ನ ದುಂಬು ಇಪ್ಪುನ ಸವಾಲ್‍ಲಾ ಅಂದ್.

ತುಳುನಾಡ್‍ದ ಜನಕುಲು ಕವಿರಾಜಮಾರ್ಗಕಾರೆ ಪನ್ನಲೆಕ್ಕೊ ಕುರಿತೋದದೇ ಕಾವ್ಯ ಪ್ರಯೋಗ ಮಲ್ತಿನಕುಲು. ಜನಪದ ಸಾಹಿತ್ಯದ ಮಾಮಲ್ಲ ಸಂಪತ್ತ್ ತುಳುನಾಡ್ದ ಜನಕುಲೆನ ನಾಲಗೆಟ್ ನಲಿತೋಂತ್ತಿತ್ತ್‍ಂಡ್. ಪಾಡ್ದನೊ, ಕಬಿತೆ, ಗಾದೆ, ಎದ್‍ರ್‍ಕತೆ, ಉರಲ್, ಅಜ್ಜಿಕತೆಕುಲುನ ಬಂಡಾರೊ ತುಳುವೆರೆಟ ಮಸ್ತ್ ಇತ್ತಿನ ಕಾಲಘಟ್ಟೊ ಒಂಜಿ ಇತ್ತ್‍ಂಡ್. ತಲೆಮಾರ್ದ್ ತಲೆಮಾರ್‍ಗ್ ಸಂಸ್ಕøತಿನ್ ಪಗರುನ ಕಾಲೊಡು ಈ ಜನಪದ ಸಾಹಿತ್ಯದ ಸ್ಥಾನಮಾನಗ್ ಬಿಲೆ ಕಟ್ಟ್ಯೇರೆ ಸಾದ್ಯೊ ಇಜ್ಜಾಡ್. ಪತ್ತ್ ಇಲ್ಲ್ ಇತ್ತಿನಲ್ಲ್, ಪತ್ತ್ ಜನೋ ಸೇರಿನಲ್ಲ್ ಜನಪದ ಸಾಹಿತ್ಯೊದ ಬಳಕೆ ಸಾಧಾರಣೊ ಆವೊಂತ್ತಿತ್ತ್‍ಂಡ್. ಅವು ತುಳುನಾಡ್‍ದ ಚರಿತ್ರೆನ್ ತೆರಿಯೆರೆ ಬೆರಿಸಾಯಾತ್ ಉಂತ್ತ್‍ತಿತ್ತ್‍ಂಡ್. ಅತ್ತಾಂತೆ ಇಂಚಿಪ ವರ್ಸೊಗು ಮುಟ್ಟಲಾ ಜನಕುಲೆಗ್ ಮನರಂಜನೆನ್‍ಲಾ ಕೊರೋಂತಿತ್ತ್‍ಂಡ್. ಏಪೊ ಬೇತೆ ಮನರಂಜನಾ ಮಾಧ್ಯಮೊಲು ಬತ್ತೊನೊ ಅಪಗ ತುಳು ಮೂಲ ಸಂಸ್ಕøತಿತ ಮನರಂಜನೆಲು ಮಾಜಿತ್ ಪೋಯೊ. ಉಂದುವೇ ಸಾಂಸ್ಕøತಿಕ ಸ್ಥಿತ್ಯಂತರೊ.

ಉಂದುವೇ ಸ್ಥಿತಿ ತುಳುನಾಡ್‍ದ ಆಚರಣೆ, ಆರಾಧನೆ, ನಲಿಕೆ, ಪರ್ಬೊಲೆಗ್‍ಲಾ ಬತ್ತ್‍ತ್ತ್‍ಂಡ್. ಇಲ್ಲ್ ಇಲ್ಲ್‍ಡ್ ಆಚರಣೆ ಮಲ್ತೊಂದಿತ್ತಿನ ಪರ್ಬೊಲು ಇನಿ ಮೈದಾನೊಗು ದತ್ತ್‍ತೊ. ಇಲ್ಲಾಲ್ ಮಾಂತ ಸದಸ್ಯೆರ್ ಒಟ್ಟು ಸೇರ್ದ್ ಮಲ್ತೊಂದಿತ್ತಿನ ಆರಾಧನೆಲು ಇನಿ ಸಾಮೂಹಿಕವಾದ್ ನಡತೋದ್‍ಂಡು. ಕೋಟಿಚೆನ್ನಯೆ, ಬಲೀಂದ್ರೆ, ಸಿರಿ, ಉಳ್ಳಾಕ್ಲು ಇಂಚಿತ್ತಿ ಕಾರ್ಣಿಕದ ದೈವೊಲೆನ ಆರಾಧನೆ ಇನಿ ಕೇವಲ ನಂಬಿಕೆಯಾತ್ ಮಾತ್ರೊ ಒರಿತ್ತಿಜ್ಜಿ. ಅವೊಂಜಿ ವ್ಯಾವಹಾರಿಕ ನೆಲೆಲಾ ಆವೊಂತುಂಡ್. ನಂಬಿನಕುಲೆಕ್ ಇಂಬು ಕೊರ್ಪೊಂದು ನಂಬೊಂತು ಬತ್ತಿನ ಈ ದೈವೊಲೆನ್ ಇನಿ ಕಾಸ್ ಒಟ್ಟು ಸೇರ್‍ಸಾಪುನ ಮಾಧ್ಯಮವಾತ್ ಮಲ್ತ್‍ತೊಂತುಲ್ಲೊ. ತುಳುವೇರ್‍ನ ಸಂಸ್ಕøತಿ ಬೊಕ್ಕೊ ಬದ್‍ಕ್‍ದ ಆವಿಭಾಜ್ಯ ನೆಲೆಯಾತಿತ್ತ್‍ನ ದೈವೊಲೆಗೆ ಇನಿ ನೆಲೆ ಇಜ್ಜಾಂದಿನ ಸ್ಥಿತಿ ಉಂಡಾತ್ತ್‍ಂಡ್. ಜಾಗತೀಕರಣದ ಪ್ರಕ್ರಿಯೆ ತುಳುವೆರ್‍ನ ಜಾಲ್‍ಗ್ ಮುಟ್ಟ ಬತ್ತ್‍ತ್ತ್ ನಲಿತ್ತೋಂತುಂಡು. ಪ್ರಾದೇಶಿಕವಾಯಿನ ನಂಬಿಕೆ ನಡವಳಿಕೆ ಪರಕೀಯ ವ್ಯಕ್ತಿಲುನ ಅಪಹಾಸ್ಯಗು ತಿಕ್ಕ್‍ದ್ ನರಲೊಂತುಂಡು. ಜಾಗತೀಕರಣಂದ್ ಪನ್ಪಿನವು ಕೇವಲ ಬೇತೆ ದೇಸೊಗು ಮಾತ್ರೊಂದ್ ತೆರಿಯೆರೆ ಬಲ್ಲಿ. ಬೇತೆ ಬಾಸೆ, ಬೇತೆ ಪ್ರದೇಸೊ, ಬೇತೆ ಸಂಸ್ಕøತಿದ ಜನಕುಲು ನನೊಂಜಿ ಬಾಸೆ, ಸಂಸ್ಕøತಿನ್ ನಿಂಗ್ಯೆರೆ ಸುರುಮಾಲ್ತ್‍ಂಡ ಅವುಲಾ ಜಾಗತೀಕರಣಾಂದೇ ಪನೊಲಿ. ತುಳುನಾಡ್‍ಟ್ ಅತಿಯಾತ್ ಬಳಕೆಯಾಪುನ ಕನ್ನಡ, ಮಲೆಯಾಳ, ಕೊಂಕಣಿ, ತಮಿಳ್, ಇಂಗ್ಲಿಷ್ ಇಂಚಿತ್ತಿ ಬಾಸೆಲು ತುಳುತ ಮಟ್ಟ್‍ಗ್ ಜಾಗತೀಕರಣತ ಪ್ರಭಾವೊಲೇ ಆತಿಪ್ಪುವೊ. ಅಂಚಾತ್ ತುಳು ಸಂಸ್ಕøತಿನ್ ಬುಲೆಪ್ಪಾಯಿನ ಜನಕುಲೇ ಬೇತೆ ಸಾಂಸ್ಕøತಿಕ ಬದ್‍ಗ್ ವರ್ಗಾವಣೆಯಾಯೆರೆ ಸಾಧ್ಯವುಂಡು.

ತುಳು ಜನಪದ ಸಾಹಿತ್ಯೊ, ನಂಬಿಕೆ, ಆಚರಣೆ ಬುಡುತು ಎಂಚ ತುಳು ಸಂಸ್ಕøತಿನ್ ತೂಯೆರೆ ಸಾಧ್ಯೊ ಇಜ್ಜೋ, ಅಂಜನೆ ತುಳುನಾಡ್ದ ಭೌತಿಕ ವಸ್ತುಲೆನ್ ಬುಡುತು ತುಳು ಸಂಸ್ಕøತಿನ್ ಮಾನ್ಯ ಮಲ್ಪಿಯೆರೆ ಸಾಧ್ಯ ಇಜ್ಜಿ. ಜಗತ್ತ್‍ಡ್ ಇತ್ತಿನ ಮಾಂತಾ ಆಧುನಿಕ ವಸ್ತುಲು ಇನಿ ತುಳುವೆರೆ ಕೈಟುಂಡು. ಅಂಚಾದ್ ಸಾಂಪ್ರದಾಯಿಕವಾಯಿನ ಪುರಾಕ್‍ದ ವಸ್ತುಲೆನ ಪುದರೇ ಮಾಜ್‍ತ್ ಪೋವೊಂತುಂಡು. ತುಳುವೆರ್‍ನ ತರೆಟಿತ್ತಿ ಮುಟ್ಟಾಲೆಡ್ದ್ ಪತ್ತ್‍ತ್ ಏತೋ ಟನ್ ದಿಂಜುನ ಪತ್ತಾಯೊಗು ಮುಟ್ಟ ಮಸ್ತ್ ವಸ್ತುಲು ತುಳುವೆರೆಗ್ ಬೋಡಾತ್ತಿತ್ತ್‍ಂಡ್. ನೊಗೊ ನಾಯೆರ್ ಸಂಸ್ಕøತಿತ ಪ್ರಧಾನ ಭಾಗವಾದಿತ್ತ್‍ಂಡ್. ಕಂಡದ ಬೆನ್ನಿಗ್ ಬೊಡಾಯಿನ ನಾನಾ ಸಾಮಗ್ರಿ ತುಳುವೆರೆ ಜಾಲ್‍ಟ್, ಕಂಡೊಟು, ಪಿತ್ತ್‍ಲ್‍ಡ್ ಏಪೊಲಾ ಜೀವಂತವಾತ್ತಿತ್ತ್‍ಂಡ್. ಐತೊಟ್ಟುಗು ಭಾವನಾತ್ಮಕ ಸಂಬಂದೊನು ಬುಳೆಪಾತಿತ್ತ್‍ನ ತುಳುವೆರ್ ಅವು ಇಜ್ಜಾಂದೇ ಬದ್‍ಕೇ ಇಜ್ಜೀಂದ್ ಪನ್ಪಿನಾಡೆಗ್ ಮುಟ್ಟ ನಂಬೋಂತ್ತಿತ್ತೇರ್. ಪರ್ಕತ್ತಿ, ಉಜ್ಜೆರ್, ಕಳಸಿಗೆಲು ತುಳುನಾಡ್‍ತ ಬೇತೆಬೇತೆ ಜಾಗೆಡ್ತ್ ಜಾಗಕಾಲಿ ಮಾಲ್ತ್‍ತ್ ಪತ್ತಿರುವೊ ವರ್ಸೊನೇ ಆವೊಂತು ಬತ್ತ್‍ಂಡ್. ಅಗತ್ಯೊ ಇಜ್ಜಾದಿ ವಸ್ತುಲು ನಮ ನಡುಟು ಇಪ್ಪೊಡೋದು ಪನ್ಪಿನವುಲಾ ಸಮೊಅತ್ತ್. ಆಂಟ ಅಗತ್ಯೊ ಇಜ್ಜಾತಿಲೆಕ್ಕೊ ಮಾಲ್ತಿನ ನಮ ಸಾಂಸ್ಕøತಿಕ ಪಲ್ಲಟ ಬದ್‍ಕ್ದ ದೃಷ್ಟಿಟ್ ಸರೀಂದ್ ತೋಜುಜಿ. ಚೊಟ್ಟೆ ಮದತ್ತ್‍ತ್ ನೀರ್ ದೆತೊಂತಿತ್ತಿ ಕಾಲೊಟು ನೀರ್‍ಗ್ ಕಡ್ಯತ ಸಾಲ್ ಉಂತುನ ಸ್ಥಿತಿ ಇಜ್ಜಾಡ್. ಚೊಟ್ಟೆತ ಗುಂಡಿಕ್ ಕರೆಂಟ್ ಪಂಪು ಬುರ್‍ನ ಮನತಾನಿಡ್‍ದ್, ಬರ್ಸೊ ಉಂತ್ತಿನ ಗಳಿಗೆಯಾಂಟಲಾ ನೀರ್‍ತ ಕಡ್ಯ ರೋಡುಡು ಉಂತ್ಯೆರೆ ಸುರುವಾಪುಂಡು. ಉಂದು ತುಳುನಾಡ್‍ದ ಇನಿತ ಸ್ಥಿತಿಗತಿ.

ನೇತ್ರಾವತಿ, ಕುಮಾರಧಾರ, ಸೀತಾ, ಸ್ವರ್ಣ, ಪಯಸ್ವಿನಿ ಇಂಚಿತ್ತಿ ಮಲ್ಲಮಲ್ಲ ತುದೆಕುಲು ವರ್ಷೊ ಪೂರ್ತಿ ಪರಿತಂತ್ತಿತ್ತೊ, ಆಂಟ ಇನಿ ಬರ್ಸೊ ಉಂತ್ತಿನ ಮನತಾನಿ ಜೊಕುಲೆಗ್ ಕ್ರಿಕೇಟ್ ಗೊಬ್ಬುನ ಮೈದಾನವಾಪುಂಡು. ಜಗತ್ತ್‍ದ ಬೇತೆಬೇತೆ ನಾಗರೀಕತೆಲು ಪುಟ್ಟಿನವು ತುದೆಬರಿಟ್, ಅಂಚನೆ ತುಳುನಾಡ್ದ ಜನಕುಲು ಹೆಚ್ಚ ಸಂಖ್ಯೆಟ್ ಬದುಕೊಂತಿತ್ತಿನವುಲಾ ಈ ತುದೆಬರಿಟೇ. ಆಂಟ ಇನಿ ಅವುಯೇ ತುದೆತ ಉಲಾಯಿ 5 ಸೆಂನ್ಸ್ ಜಾಗೆಗ್ ಬೇಲಿ ಪಾಡುನ ಸ್ಥಿತಿನ್ ದಿನೊದಿನೊ ತೂವೊಂದುಲ್ಲೋ. ಉಂದು ಪ್ರಕೃತಿ ಸಂಪತ್, ಜಲಸಂಪತ್‍ಗ್ ಪುದಾರ್ ಪೋಯಿನ ತುಳುನಾಡ್ದ ಪರಿಸ್ಥಿತಿ. ಆಜಿ ತಿಂಗೊಳು ಹಲಫಲ ಕೊರ್‍ದು ಸಾಕೋಂತಿತ್ತಿನ ಪೆಲ,ಕುಕ್ಕು ಇಂಚಿತ್ತಿ ಮರೊಕುಲು ಏಪೊನೋ ಟಿಂಬರ್ ಲಾರಿ ಬಡ್ತ್‍ತ್ ಮಿಲ್ಲ್‍ಗ್ ಸೇರ್‍ದಾತ್ತ್‍ಂಡ್. ಒಂಜೊಂಜಿ ಕಾರ್ಣಿಕದ ಪುದಾರ್ ದೀತ್ ಲೆತ್ತೋಂತ್ತಿತ್ತಿನ ಗುಡ್ಡೆ,ಕರ್ಗಲ್ಲ್‍ಲು ಇನಿ ಜೆಸಿಬಿದ ತುಂಬಿಕೈಕ್ ತಿಕ್ಕ್‍ತ್ ಪೊಡಿಯಾತ್‍ಂಡ್. ಅಂಚಾತ್ ಗುಡ್ಡೆ ಪೋತ್ ಬೈಲ್, ಬೈಲ್ ಪೋತ್ ಇಲ್ಲ್, ಇಲ್ಲ್‍ದ ಮಿತ್ತ್ ಇಲ್ಲ್ ಕಟ್ಟ್‍ದ್ ದುಡ್ಡ್ ಮಲ್ಪಿನವು ಸಂಸ್ಕøತಿತ ಭಾಗವಾತ್ತ್‍ಂಡ್.

ತುಳು ಸಂಸ್ಕøತಿ ಪಚ್ಚೆಯಾತ್ತಿತ್ತ್‍ನ ಕಾಲೊ ಕೇವಲ ಇರುವತ್ತೈನ್ ವರ್ಸೊಗು ದುಂಬು. ಈ ಇರುವತ್ತೈನ್ ವರ್ಸೊಡ್ದ್ ಬುಕ್ಕೊ ಆಯಿನ ಬದಲಾವಣೆನ್ ತೂಂಡ ಇನಿ ಪೋಡಿಯಾಪುಂಡು. ನಮ ದುಂಬುತ ತಲೆಮಾರ್‍ಗ್ ಈ ಭೂಮಿ ಒರಿಯೋಡೂಂದು ಪನ್ಪಿನ ಕಳಕಳಿ ಇತ್ತ್‍ಂಡ್‍ದಾಂಡ ತುಳು ಸಂಸ್ಕøತಿಡ್ ಇಪ್ಪುನ ಜೀವಪರ ಅಂಶೊಲೆನ್ ನಮೊ ತೆರಿಯೊಡಾಪುಂಡು. ಈ ನೆಲೊ, ಈ ನೆಲೊತ್ತ ನೀರ್, ಗಾಳಿ, ಹಲಫಲೊ, ಒರಿಪುನಂಚಿನ ಸಾಂಸ್ಕøತಿಕ ಎಚ್ಚರೊ ಪುಟ್ಟೊಡಾಪುಂಡು. ತುಳುವೆರ್‍ನ ಪ್ರತೀ ನಂಬಿಕೆ, ಆರಾಧನೆ, ಆಚರಣೆ, ಬೊಕ್ಕ ಕೆಲಸೊತ ಪಿರಾವು ಇತ್ತಿನ ಒಂಜೇ ಒಂಜಿ ಸಂಗತಿ ಈ ಭೂಮಿ ಒರಿಯೊಡೂಂದ್ ಪನ್ಪಿನವು. ಈ ಭೂಮಿಟಿತ್ತಿನ ಪ್ರತೀ ಜೀವೊಸಂಕುಲೊ ಸುಕ,ಸಂತೋಸೊಡು ಬದುಕೊಡೂಂದು ಪನ್ಪಿನವೇ ತುಳು ಜನಪದ ಸಂಸ್ಕøತಿ, ಉಂದುವೇ ತುಳುವೆರ್‍ನ ಬದುಕ್. ಈ ಬದ್‍ಕ್‍ನ್ ಕಟ್ಯೆರೆ ನಮಕ್ ಸಾಧ್ಯೊ ಆಂಟ ಬಲಿಂದ್ರೆ ಕಟ್ಟಿನ ಕಾಲ್ಪನಿಕ ತುಳು ರಾಜ್ಯೊನು ನಿಜವಾತ್ ತೂಯೆರೆ ಸಾಧ್ಯವುಂಡು..

(ಮಂಗಳೂರು ಆಕಾಶವಾಣಿ ಪ್ರಸಾರ 28 ಮಾರ್ಚ್ 2014) ಡಾ.ಸುಂದರ ಕೇನಾಜೆ

(ಧರ್ಮರಸು ಸ್ಮರಣ ಸಂಚಿಕೆ ಏಪ್ರೀಲ್ 2014)