ತುಳುವರ್‍ನ ಆರಾಧನಾ ಸಂಪ್ರದಾಯೊ
ಅಂಚಿ ಕನ್ನಡೊ ಇಂಚಿ ಮಲೆಯಾಳೊ, ಉಂದೆನ ವiಧ್ಯೊ ಉಪ್ಪುನ ತುಳುನಾಡ್, ಪ್ರಾದೇಶಿಕವಾತ್ ಮಲ್ಲವು ದಾಲಾ ಅತ್ತ್. ಆಂಟ ಬಾರಿ ಪುರಾಕ್‍ತ ಇತಿಹಾಸೊನು ಉಡಲ್‍ಟ್ ದೀತಿನ ಜಾಗೆಂದ್ ಪನ್ಪಿನ ಸತ್ಯೊ. ತುಳು ಬಾಸೆ ಬೊಕ್ಕ ತುಳುನಾಡ್ದ ಜನಕುಲೆನ ವೃತ್ತಿ ಬದ್‍ಕ್, ಉಂದು ರಡ್ಡ್ ಸೇರ್‍ತ್ ತುಳು ಸಂಸ್ಕøತಿ ಆತ್‍ಂಡ್‍ಂದ್ ಪನಿಯೆರೆ ಮಸ್ತ್ ಅಧ್ಯಯನೊಲು, ಅಭಿಪ್ರಾಯೊಲು ತುಳುನಾಡ್‍ಟ್ ತಿಕ್ಕುಂಡು. ತುಳು ಬಾಸೆ ಇನಿತ ರಾಜಕೀಯ ನಕ್ಷೆಡ್ ಮೂಜಿನಾಲ್ ಜಿಲ್ಲೆಟ್ ಮಾತ್ರೊ ತೂಯೆರೆ ತಿಕ್ಕುನಾಂಟಲಾ ಆ ಬಾಸೆಗ್ ಒಂಜಿ ಗಟ್ಟಿಯಾಯಿನ ಸಾಂಸ್ಕøತಿಕ ಹಿನ್ನಲೆ ಉಂಡು. ಈ ಸಾಂಸ್ಕøತಿಕ ಹಿನ್ನಲೆಗ್ ಬಾರಿ ಪುರಾಕ್‍ತ ಇತಿಹಾಸಲಾ ಉಂಡು. ಇಂಚಿತ್ತಿ ಬಾಸೆತ ಸಾಂಸ್ಕøತಿಕ ಹಿನ್ನಲೆಗೆ ಕಾರಣವಾಯಿನ ಅಂಶೋಲೆಟ್ ತುಳುನಾಡ್ದ ಆರಾಧನಾ ಸಂಪ್ರದಾಯೊನು ದುಂಬು ದೀವಡಾಪುಂಡು.
ತುಳುನಾಡ್‍ತ ಆರಾಧನಾ ಸಂಪ್ರದಾಯೊ ಗಟ್ಟಿಯಾಯೆರೆ ಮುಲ್ತ ಬೆನ್ನಿ-ಬೇಸಾಯೊ ಮೂಲ ಕಾರಣೊಂದ್ ಪನಿಯೆರೆಲಾ ಸಾದ್ಯೊ ಉಂಡು. ಒಂಜಿ ಸಂಪ್ರದಾಯೋಂದ್ ಪಂಡ, ಅವೊಂಜಿ ಜೀವನ ಕ್ರಮೊ. ಬದ್‍ಕ್‍ನ್ ಎಂಚ ದುಂಬು ಕೊನೊವೊಡೂಂದ್ ಪನ್ಪಿನ ವಿಚಾರೊಟು ಜಗತ್ತ್‍ತ ಮಾಂತಾ ಸಂಸ್ಕøತಿ ಬಾಸೆತಕುಲೆಗ್‍ಲಾ ಒಂಜಿ ನಿಯಮೊ ಇಪ್ಪುಂಡು. ಆ ನಿಯಮೋ ಅಕುಲೆನ ಸಂಪ್ರದಾಯೊಲಾ ಆತಿಪ್ಪುಂಡು. ಸಾಮಾನ್ಯವಾತ್ ಅಲಿಖಿತವಾಯಿನ ಈ ಸಂಪ್ರದಾಯತ ಪಿರಾವು ಮಸ್ತ್ ಆಚರಣೆಲು, ನಂಬಿಕೆಲು ಬೊಕ್ಕ ಪ್ರಾಕೃತಿಕವಾಯಿನ ಸನ್ನಿವೇಶೊಲು ಕೆಲಸ ಮಾಲ್ತಿಪುಂಡು. ತುಳುನಾಡ್ದ ಸಂಪ್ರದಾಯೊಟ್ ಮುಲ್ತ ವೃತ್ತಿಯಾಯಿನ ಬೆನ್ನಿ, ಆರಾಧನೆಯಾಯಿನ ಭೂತಾರಾಧನೆ, ನಾಗಾರಾಧನೆ, ಯಕ್ಷರಾಧನೆ, ದೇವೆರ್‍ನ ನಂಬಿಕೆದ ಮಸ್ತ್ ಪ್ರಭಾವೊನು ತುಯೆರೆ ಸಾಧ್ಯೊ ಉಂಡು. ಅತ್ತಾಂತೆ ಈ ಮಾಂತ ಆರಾಧನೆಲು ಮುಲು ಒಂಜಿ ಸಾಂಸ್ಕøತಿಕ ಸನ್ನಿವೇಶೋನು ಸೃಷ್ಠಿ ಮಾಲ್ಪೆರೆ ಕಾರಣ ಆತ್‍ಂಡ್. ಇಂಚಿನ ವ್ಯವಸ್ಥೆನ್ ಜನಪದ ವಿಧಾನೊತ ಆರಾಧನಾ ಸಂಪ್ರದಾಯೊ ಬೊಕ್ಕೊ ವೈದಿಕ ವಿಧಾನೊತ ಆರಾಧನಾ ಸಂಪ್ರದಾಯೊಂದ್ ರಡ್ಡ್ ವಿಭಾಗ ಮಲ್ತ್‍ತ್ ಲೆಪ್ಪೊಲಿ.
ಸಾಮಾನ್ಯವಾತ್ ಒಂಜೇ ಪರಿಕಲ್ಪನೆನ್ ಈ ರಡ್ಡ್ ವಿಧಾನೊಟು ಆರಾಧನೆ ಮಲ್ಪಿನ ಕೆಲಸೊ ಪುರಾಕ್‍ಟೇ ನಡತ್ತ್‍ತ್ ಬತ್ತ್‍ತ್ತ್‍ಂಡ್. ಜನಪದ ಸಂಪ್ರದಾಯೋ ಜನಕುಲೆನ ನಡುಡ್ತು ಬತ್ತಿನ ವ್ಯವಸ್ಥೆ ಬೊಕ್ಕೊ ಐಕ್ಕೊಂಜಿ ನಿರ್ದಿಷ್ಟವಾಯಿನ ಚೌಕಟ್ಟೂಂದು ಇಜ್ಜಿ. ಜನಕುಲು ಬದಲಾಯಿ ಲೆಕ್ಕೊನೇ ಈ ಸಂಪ್ರದಾಯೊಟುಲಾ ಬದಲಾಣೆ, ತಿದ್ದುಪಡಿ, ಪೊಸ ಸೇರ್ಪಡೆ, ಪರತ್ತ್ ಕಲೆಪುನ ಸಂಗತಿ ಇಪ್ಪುಂಡು. ಆಂಟ ವೈದಿಕ ಸಂಪ್ರದಾಯದ ಆರಾಧನೆಟ್ ಬಲಾವಣೆ ಕಡಮೆ. ಐಕೊಂಜಿ ನಿರ್ದಿಷ್ಟವಾಯಿನ ಚೌಕಟ್‍ಲಾ ಇಪ್ಪುಂಡು. ಶಾಸ್ತ್ರೀವಾತ್ ಇಪ್ಪುನ ಈ ಸಂಪ್ರದಾಯೊನು ಬದಲಾವಣೆ ಮಾಲ್ಪೆರೆಸುಲಭ ಸಾಧ್ಯೊ ಇಜ್ಜಿ. ಭೂತಾರಾಧನೆ ಬೊಕ್ಕ ಪುರಾಕ್‍ತ ನಾಗಾರಾಧನೆ ಜನಪದ ಆರಾಧನೆಗ್ ಎಡ್ಡೆ ಉದಾಹರಣೆ. ನಾಗಾರಾಧನೆತ ಕೆಲವು ರೂಪೊ ಬೊಕ್ಕೊ ದೇವೆರೆ ಆರಾಧನೆ, ವೈದಿಕ ಆರಾಧನೆತ ಭಾಗೊ. ವರ್ಗಪರಿಕ್ಪನೆಟ್ ಆಲೋಚನೆ ಮಲ್ಪುಂದಾಂಟ, ಮೇಲ್ವರ್ಗತ ಸಂಪ್ರದಾಯೊ ಬೇತೆ ಅಂಚನೆ ತಿರ್ತವರ್ಗತ ನಂಬಿಕೆ ಸಂಪ್ರದಾಯೊ ಬೇತೆನ್‍ಂದ್ ಪನೊಲಿ. ಆಂಟ ಒಂಜಿ ಸಾಮಾಜಿಕ ವ್ಯವಸ್ಥೆಟ್ ಉಂದು ಜೊತೆಯಾತ್ ಪೋಪುನ ಬೊಕ್ಕೊ ಪೋವೊಡಾಯಿನ ಅನಿವಾರ್ಯೊ ಇಪ್ಪುಂಡೂಂದ್ ಪನ್ಪಿನ ಸತ್ಯೊ.
ಭೂತಾರಾಧನೆ: ದುಂಬುತ ಕಾಲೋಟು ತುಳುನಾಡ್‍ಟ್ ‘ನೂತೊಂಜಿ ಭೂತೊ, ನೋತೊಂಜಿ ಬಿತ್ತ್’ಂದ್ ಪನ್ಪಿನ ಗಾದೆಯೊಂಜಿ ಚಾಲ್ತಿಟ್ ಇತ್ತ್‍ಂಡ್. ಅವು ಇತ್ತೆ, ಸಾವಿರತೊಂಜಿ ಭೂತೊಂದ್‍ಲಾ, ಅಂಚನೇ ಸುಮಾರ್ ಸಾವಿರೊ ಬಿತ್ತ್‍ಲಾ ತುಯೆರೆ ಸಾಧ್ಯೊ ಉಂಡು. ಭೂತಾರಾಧನೆ ಬಾರಿ ಪುರಾಕ್‍ತ ಸಂಪ್ರದಾಯೊ. ಭೂತೊಲೆನ್ ಕೋಲೊ ರೂಪೊಟು ಅತ್ತಾಂಟ ತಂಬಿಲೊ ರೂಪೊಟು ಆರಾಧನೆ ಮಾಲ್ಪಿನ ಸಂಪ್ರದಾಯೊ ಬಾರಿ ಪುರಾಕ್‍ತವು. ನಿಜವಾತ್ ತುಳುನಾಡ್‍ತ ಸಂಪ್ರದಾಯೊಟು ಭೂತಾರಾಧನೆ ಸಂಪ್ರದಾಯೊನೇ ಮಾಮಲ್ಲವು ಬೊಕ್ಕ ಬಾರಿ ಪುರಾಕ್‍ತವುಂದು ಪನೊಲಿ.
ಭೂತಾರಾಧನಾ ಸಂಪ್ರದಾಯೊಗ್ ಸುಮಾರ್ ಐನೂದು ಆಜಿನೂದು ವರ್ಷತ ಇತಿಹಾಸ ಉಪ್ಪುನೆನ್ ವಿದ್ವಾಂಸೆರ್ ಪತ್ತೆ ಮಲ್ತ್‍ತೆರ್. ಅಂಚನೆ ಈ ಸಂಪ್ರದಾಯೊಟು ಏತೇ ಬದಲಾವಣೆ ಆಂಟಲಾ ಮೂಲ ಆಶಯ ಇನಿಲಾ ನಂಬಿಕೆನೇ ಆಯಿನೇಡ್ದಾರೊ ಇನಿಲಾ ಈ ಸಂಪ್ರದಾಯೋ ತರೆಡ್ದ್ ತರೆಕ್ ಕಡತೋಂದು ಬರೋಂತುಂಡು. ಭೂತಾರಾಧನೆ ಸಂಪ್ರದಾಯೊಗು ಒಂಜಿ ನಿರ್ದಿಷ್ಟವಾಯಿನ ಚೌಕಟ್ಟ್ ಉಂಡು. ಜನಪದೆರ್ ಆ ಚೌಕಟ್ಟ್‍ತ ಉಲಾಯಿ ಐನ್ ಒರಿಪಾವೊಂತು ಬರೊಂತಿಪ್ಪೆರ್. ಆ ಚೌಕಟ್ಟ್ ತಪ್ಪಾಂದಿ ಲೆಕ್ಕೊ, ತೂಪಿನ ಕೆಲಸೊನು ಇಡೀ ವ್ಯವಸ್ಥೆ ಮಲ್ತೊಂದು ಬರುಪುಂಡು. ಭೂತಾರಾಧನೆ ಸಂಪ್ರದಾಯೊನು ಒರಿಪ್ಪಾರೆ ಭೂತೊದ ಪಾಡ್ದನೊ, ನುಡಿಕಟ್ಟ್, ಬೊಕ್ಕೊ ಭೂತದ ಬಗ್ಗೆ ಇಪ್ಪುನ ನಂಬಿಕೆನೇ ಮುಖ್ಯ ಕಾರಣೊ. ಸಾಮಾನ್ಯವಾತ್ ಪಾಡ್ದನೊ ಭೂತದ ಚರಿತ್ರೆ, ಅವು ಪುಟ್ಟಿ ಬಳತ್ತಿನ ಪ್ರದೇಶೊ, ಅಯಿನ ಬಿರ್ಸಾತ್ತಿಗೆ, ಅವು ಪೋಯಿನ ಊರು, ಕಾರ್ಣಿಕೊ ಇಂಚಿತ್ತಿ ಸಂಗತಿಲೆನು ಪನ್ಪನವು ಹೆಚ್ಚ. ಅಂಚಾತ್ ಪಾಡ್ದನ ಸಂಪ್ರದಾಯೋ ತುಳುನಾಡ್‍ತ ಮಾಂತಾ ಭೂತೊಲೆಗ್‍ಲಾ ಒಂಜೇ ಲೆಕ್ಕೊ ಇಪ್ಪುನವು ತೆರಿದ್ ಬರ್ಪುಂಡು. ಅಂತನೆ ಭೂತದ ನುಡಿಕಟ್ಟ್‍ಟ್ ಜನಕ್ಕುಲೆಗೆ ಅಭಯ ಕೊಪ್ರ್ಪಿನ ಸಂದರ್ಭೊಲೆನ್ ಹೆಚ್ಚಾತ್ ತೂಯೆರೆ ಸಾಧ್ಯೊ ಉಂಡು. ಇಂಚಿತ್ತಿ ಭೂತರಾಧನೆಟ್ ಜನಪದೆರೆಗ್ ಒಂಜಿ ನಂಬಿಕೆ ಪುಟ್ಟ್‍ತ್ತಿಪುಂಡು, “ನಮನ್ ಕಾಪುನ ಶಕ್ತಿಯೊಂಜಿ ನಮಾಡ್ದ್ ಮಿತ್ತ್ ಉಂಡು, ಐನ್ ನಂಬೋಂತು ಬರೊಡು, ಐಕ್ ಒಂಜಿ ರೀತಿ ರಿವಾಜುನು ಮಾಲ್ತ್ ದೀವೊಡು”ಂದ್ ಪನ್ಪಿನವು. ತುಳುವೆರ್‍ನ ಈ ಆಶಯನೇ ಇನಿ ಸಂಪ್ರದಾಯವಾತ್ ದುಂಬುಪೊಂಪುಂಡು.
ಮಾಂತಾ ಸಂಪ್ರದಾಯೊಟ್‍ಲಾ ಒಂಜಿ ಕಾಲೋ, ಪ್ರದೇಶೋ ಬೊಕ್ಕೊ ಕೆಲವು ಇಜ್ಜೊ ಹಲವು ಸಮುದಾಯೊದ ಪ್ರಭಾವೊ ಇತ್ತೇ ಉಪ್ಪುಂಡು. ಐಕ್ ಸರಿಯಾತ್ ಅಯಿಟ್ ವ್ಯತ್ಯಾಸೊಲಾ ಉಪ್ಪುಂಡು. ಭೂತಾರಾಧನೆಟ್‍ಲಾ ತುಳುನಾಡ್ದ ಸಂಪ್ರದಾಯೊ ಒಂಜೇ ಲೆಕ್ಕೊ ಇಚ್ಚಿ. ಒಂಜೊಂಜಿ ಭೂತೊಗು ಒಂಜೊಂಜಿ ಲೆಕ್ಕೊ, ಒಂಜೊಂಜಿ ಪ್ರದೇಶೋಟು ಐಕೈಕ್ ಆಪಿ ಲೆಕ್ಕೊ ಸಂಪ್ರದಾಯೋನು ಪುಣೈನೆನ್ ತೂಯೆರೆ ಸಾಧ್ಯ ಉಂಡು. ಒಂಜಿ ಸಾಮಾನ್ಯ ಉದಾರಣೆ, ತುಳುನಾಡ್‍ತ ಕೆಲವು ಪ್ರದೇಶೋಟು ಕಲ್ಲುರ್ಟಿ ಭೂತೊಗು ಬಾರಿ ಮಲ್ಲ ಸೂಟೆದ ಮೇಲೆರಿ ಮಲ್ಪುವೆರ್. ಅವುವೇ ಸುಳ್ಯ ಭಾಗೊಟು ಒಂಜಿ ಕಿನ್ಯ ಸೂಟೆಟ್ ಸುಧಾರ್ಪೆರೆ. ಅಂಚನೆ ಕೆಲವು ದೈವೊಲೆನ್ ದೇವಕ್ರಿಯೆಟ್ ಕೆಲವು ಜಾಗೆಟ್ ಆರಾಧನೆ ಮಲ್ಪುವೆರ್, ಅವೇ ದೈವೊನ್ ಕೆಲವು ಜಾಗೆಟ್ ಅಸುರ ಕ್ರಿಯೆಟ್ ಆಚರಣೆ ಮಲ್ಪಿನವು ಸಂಪ್ರದಾಯೋ.
ಭೂತಾರಾಧನಾ ಸಂಪ್ರದಾಯೋಟು ತುಳುವೆರೆನ್ ಮನಸ್ಥಿತಿಟ್ ರೂಪು ಪಡೆಯೆರೆ ಅಕುಲೆನ ಜಾತಿ, ಧರ್ಮೊ, ವಣಸ್-ತಿನಿಸ್ ಮೊಕ್ಕೊ ಪ್ರಾಕೃತಿಕ ಸನ್ನಿವೇಶೋ ಮಲ್ಲ ಪ್ರಭಾವೊ ಬೀರ್‍ನೈನ್ ತೂವೊಲಿ. ಒಂಜಿ ಜಾತಿ, ಧರ್ಮೊ, ಸಂಪ್ರದಾಯೊಗ್ ಸರಿಯಾತ್ ಆರಾಧನಾ ಸಂಪ್ರದಾಯೋ ಉಪ್ಪುನೈನ್ ತುಳುನಾಡ್‍ಟ್ ತುವೊಲಿ. ಉದಾಹರಣೆಗ್ ಜೈನೆರ್‍ನ ಭೂತಾರಾಧನೆಟ್ ದೇವಕ್ರಿಯೆಗ್ ಪ್ರಾಮುಖ್ಯತೆ ಜಾಸ್ತಿ ಇತ್ತ್‍ಂಟ, ಅವುವೇ ಧರ್ಮೊಗ್ ಸರಿ ಸಮಾನವಾಯಿನ ಬಂಟೆರೆಟ್ ಅಸುರಕ್ರಿಯೆತ ಆರಾಧಾನಾ ಸಂಪ್ರದಾಯೊ ಹೆಚ್ಚ. ಉಂದೆಕ್ ಕಾರಣೋ, ಆ ಜಾತಿತ ಒಣಸ್-ತಿನಿಸ್. ಜೈನೆರ್‍ನ ಸಸ್ಯಾಹಾರ ಬೊಕ್ಕೊ ಬಂಟೆರ್‍ನ ಮಾಂಸಾಹಾರ ಅಕುಲು ನಂಬುನ ನಂಬಿಕೆಟ್‍ಲಾ ಒಂಜಿ ಸಂಪ್ರದಾಯೊನು ಪಡೆತ್ತಿಪ್ಪುನೆನ್ ತೂಯೆರೆ ಸಾಧ್ಯೊ ಉಂಡು.
ನಾಗಾರಾಧನೆ: ತುಳುನಾಡ್‍ತ ಭೂತಾರಾಧನೆಡ್ತ್‍ಲಾ ಪುರಾಕ್ದ ಆರಾಧನೆ ನಾಗಾರಾಧನೆ. ಬೆನ್ನಿ ಸಂಸ್ಕøತಿ ಆರಂಭವಾಯಿನ ಕಾಲೋಟೇ ಮುಲು ನಾಗನ್ ನಂಬೋತ್ತು ಬತ್ತೆರ್. ನಾಗೆ ನೀರ್‍ತ ಬೊಕ್ಕೊ ಫಲವಂತಿಕೆನ್ ಕೊರ್ಪಿ ದೇವರ್‍ಂದ್ ಐನ್ ನಂಬುನ ಸಂಪ್ರದಾಯೊನು ಜನಪದರ್ ಬುಳೆಪ್ಪಾಯೆರ್. ಸಾಮಾನ್ಯವಾತ್ ಸುಗ್ಗಿ ಕಂಡೊತ ಬರಿಯೆ ಪರಿತ್ತೋತ್ತಿಪ್ಪುನ ನಾಗೆ ನಿರ್ದಿಷ್ಟವಾಯಿನ ಜಾಗೆಟ್ ನಿತ್ಯ ಇಪ್ಪುನ ಕ್ರಮೊ. ಈ ಜಾಗೆತ ಸುತ್ತಮುತ್ತ ಕಾಡ್ ಬಳತ್ತಿಪ್ಪುನೇಡ್ತಾರೋ ಜನಕುಲು ಐನ್ ನಾಗ ಬನೊಂದ್ ಪಂಡ್ತ್, ಐನ್ ರಕ್ಷಣೆ ಮಾಲ್ಪಿಯೆರೆ ಸುರು ಮಲ್ತೆರ್. ಈ ನಾಗ ಬನೊಟ್ ಇತ್ತಿ ನಾಗನ ಆರಾಧನೆಲಾ ಕಾಲಕಾಲಗು ನಡತ್ತೋಂದು ಬರಿಯೆರೆ ಸುರು ಆಂಡ್. ನಾಗನ ಆರಾಧನೆ ತುಳುನಾಡ್‍ತ ಮಾಂತಾ ಕಡೆಟ್ ಒಂಜೇ ಲೆಕ್ಕ ಇಪ್ಪುನೆನ್ ತೂವೊಲಿ. ಸುಗ್ಗಿ ಸಮಯೊಟು ಈನ್ ಆರಾಧನೆ ಮಲ್ಪುನ ಸಂಪ್ರದಾಯೊ ದುಂಬುಡ್ತೆ ಇಪ್ಪುನೇನ್‍ಲಾ ತೂವೊಲಿ.
ತುಳುವೆರ್‍ನ ನಾಗಾರಾಧನೆಟ್ ಬೇತೆಬೇತೆ ವಿಧೊ ಉಂಡು. ತುಳುನಾಡ್‍ತ ಪಡ್ಡೈ ಭಾಗೊಟು ನಾಗಮಂಡಲ, ಡಕ್ಕೆ ಬಲಿ ಪನ್ಪಿನ ಆಚರಣೆ ಜೋರು. ಉಂದು ನಾಗನ್ ವೈದಿಕ ವ್ಯವಸ್ಥೆಟ್ ತೂಪಿನ ಕೆಲಸೊ. ತುಳುನಾಡ್‍ತ ಮಾಂತಾ ಕಡೆಟ್ ತುಯೆರೆ ತಿಕ್ಕುನ ನಾಗೆ ಜನಕುಲೆಟ್ ಆರಾಧನಾ ಭಾವೊನು ಮೂಡಿಸಾಯಿನ ಏತ್ ಸತ್ಯೊನೂ, ಐನ್ ಅವಕಾಶವಾತ್ ಬಳಸಾಪುನ ಕೆಲಸೊಲಾ ಮಸ್ತ್ ನಡ್ತ್‍ಂಡ್. ನಾಗಾರಾಧನೆ ಸಂಪ್ರದಾಯೋ ಪ್ರಕೃತಿ ಆರಾಧನೆತ ಭಾಗೊಲಾ ಅಂದ್. ಕಾಡ್, ನೀರ್ ಬೊಕ್ಕ ನಾಗನ್ ಒರಿಪ್ಪಾಯೆರೆ ಬೊಡಾತ್ ಜನಪದೆರ್ ಐನ ಪಿರಾವು ಪೋಡಿಗೆನ್‍ಲಾ ಭಕ್ತಿನ್‍ಲಾ ದೀಯೆರ್. ಈ ಪೋಡಿಗೆ ಬೊಕ್ಕ ಭಕ್ತಿ ರಡ್ಡ್ ಸೇರ್ನಾಗ ಅವು ತುಳು ಸಂಪ್ರದಾಯೊಂದ್ ಆಡ್. ಅಂಚಾತ್ ತುಳು ಸಂಪ್ರದಾಯೊಟ್ ಮುಲ್ತ ಪ್ರಾಕೃತಿಕ ಸನಿವೇಶೋಲೆನ್À ಮುಖ್ಯವಾತ್ ಗಮನೊಗು ದೆತ್ತೊನೊಡಾಪುಂಡು.
ದೇವೆರೆ ಆರಾಧನೆ: ತುಳುನಾಡ್‍ಟ್ ದೇವೆರೆ ಆರಾಧನೆಗ್‍ಲಾ ಮಸ್ತ್ ವರ್ಷೊತ ಇತಿಹಾಸ ಉಂಡು. ವೈದಿಕಶಾಹಿ ವ್ಯವಸ್ಥೆ ಬತ್ತಿನ ಬುಕ್ಕೊ, ಮುಲು ಆರಾಧನಾ ಸಂಪ್ರದಾಯೊಟು ಬದಲಾವಣೆ ಆಯಿನೆನ್ ತುವೊಲಿ. ಪುರಾಕ್‍ತ ರಾಜೆರ್ ಮೂಲು ಆಳ್ವಿಕೆ ಮಲ್ಪಿನ ಕಾಲೊಟು ದೇವಸ್ಥಾನೊ ಕಟ್ಟ್‍ತ್ ದೇವೆರೆನ್ ಆರಾಧನೆ ಮಲ್ತೊಂದಿತ್ತೆರ್‍ಂದ್ ಪನಿಯೆರೆ ಬೋಡಾಯಿನ ಐತಿಹಾಸಿಕ ದಾಖಲೆಲು ಕಡಮೆ ಆಂಡಲಾ, ಮುಲ್ತ ಮೇಲ್ವರ್ಗದ ಜನಕುಲು ಕಿನ್ಯ ದೇವಸ್ಥಾನೊಲುನ್ ಕಟ್ಟತ್ತ್ ಆರಾಧನೆ ಮಲ್ಪಿನ ಸಂಪ್ರದಾಯೊನು ಬುಳೆಪ್ಪಾಂವೊಂಡೆರ್. ಈ ದೇವಸ್ಥಾನೊಟು ಶಿವೆ, ಗಣಪತಿ, ವಿಷ್ಣು, ದುರ್ಗೆ ಇಂಚಿತ್ತಿ ದೇವೆರೆನ ಬಿಂಬೊನು ದೀವೋಂತು ಆರಾಧನೆ ಮಲ್ಪಿ ಸಂಪ್ರದಾಯೊ ಬಳತ್ತಂಡ್. ಸುರೂತ ಕಾಲೊಟು ಕೇವಲ ಮೇಲ್ವರ್ಗ ಮಾತ್ರೋ ಈ ಆರಾಧನಾ ಸಂಪ್ರದಾಯೊತೊಟ್ಟುಗು ಇತ್ತ್‍ಂಟ, ಕಾಲೊ ಕರಿಲೆಕ್ಕೊ ಬೇತೆ ಜಾತಿ ವರ್ಗತಕುಲುಲಾ ಪಾಲ್‍ಪಡೆಯೆರ ಸುರುಮಲ್ತೆರ್. ಅಂಚಾತ್ ದೇವೆರೆ ಆರಾಧನಾ ಸಂಪ್ರದಾಯೋದ ಬೊಳ್ಚಿಲ್ ಜಾಸ್ತಿ ಆಂಡ್. ಆಂಟ ದೇವರ್‍ನ ಗರ್ಭಗುಡಿಕ್ಕ್ ಪೋತು ಅವುಲು ಪೂಜೆ ಮಲ್ಪಿನ ಸಂಪ್ರದಾಯೊ ಇನಿಕ್ಕ್ಲಾ ತುಳುನಾಡ್‍ತ ತಿರ್ತ ವರ್ಗೊಗು ಬತ್ತಿಜ್ಜಿ. ಅಂಚಾತ್ ಇನಿಲಾ ಈ ಸಂಪ್ರದಾಯೊಟು ಸಮಾನವಾಯಿನ ಅವಕಾಶೊನು ತೂಯೆರೆ ಸಾಧ್ಯ ಇಜ್ಜಿ.
ಇನಿ ತುಳುವೆರ್‍ನ ಜನಪದ ಆರಾಧನಾ ಸಂಪ್ರದಾಯೊಟು ಮಸ್ತ್ ಬದಲಾವಣೆ ಆತ್‍ಂಡ್. ಆ ಸ್ಥಾನೊನ್ ದೇವೆರ್‍ನ ಆರಾಧನೆ ಅಲಂಕಾರೊ ಮಲ್ತೊಂದುಂಡು. ಒಂಜಿ ಕಾಲೊಟು ಕಿನ್ಯ ಗುಡಿಟ್ಟಿತ್ತಿ ದೇವೆರ್ ಇನಿ ಮಾಮಲ್ಲ ಕಟ್ವಾಣೊತ ಉಲಾಯೆ ಕುಲ್ಲುಂತುಂಡು. ಕೋಟಿಕೋಟಿ ದುಡ್ಡು ಖರ್ಚಿ ಮಲ್ತ್‍ತ್ ದೇವಸ್ಥಾನ ಕಟ್ಟುಣ ಸಂಪ್ರದಾಯ ಬಳತ್ ಬತ್ತ್‍ಂಟ್. ಆ ದೇವಸ್ಥಾನೊತ ಉಳಾಯಿ ಕುಳುನ ದೇವೆರೆ ಬಿಂಬೊಗು ಆತೇ ಖರ್ಚಿ ಮಲ್ತ್‍ತ್ ಬ್ರಹ್ಮಕಲಶೋ ಮಾಲ್ಪಿನ ವ್ಯವಸ್ಥೆಲಾ ಇನಿ ಉಂಡು. ಐಡ್ದ್ ಬುಕ್ಕೊ ಐನ್ ತುಪಿನಂಚಿನ ಮಿತ್ತವರ್ಗತಕುಲು ಪನ್ಪಿ ಲೆಕ್ಕೆ ಕೇನುನ, ಅಕುಲೆ ಸಂಪ್ರದಾಯೊನೇ ಕಾನೂನಾತ್ ಸ್ವೀಕಾರ ಮಲ್ಪಿನ ಒಂಜಿ ಜೀವನ ಕ್ರಮೊ ಇನಿತ ಆರಾಧನಾ ವಿಧಾನೊಟು ತುಯೆರೆ ಸಾಧ್ಯವುಂಡು.
ಈ ಮೂಜಿ ಆರಾಧನಾ ಸಂಪ್ರದಾಯೊ ಅತ್ತಾಂತೆ ತುಳುವೆರೆಟ ಬೇತೆ ವಿಧನೊಲಾ ಉಂಡು. ಹಿರಿಯಾಕುಲೆನ್ ನಂಬೋಂತು ಬರ್ಪಿನ ಕ್ರಮೊ ಇನಿಲಾ ಒಂತೊಂತೆ ಉಂಡು. ಸೈತ್ತ್‍ನ ಪದಿನಾಜಿ ತಲೆಮಾರ್ ನಮ ಬೆರಿಸಾಯೊಟು ಉಂಡುಂದು ಪನ್ಪಿನ ನಂಬಿಕೆ ತುಳುವೆರ್‍ನವು. ಅಂಚಾತ್ ಅಕುಲೆನ್ ವರ್ಷಗೊರೊ ಅಗೆಲ್ ಕೊರ್ತು ಸಂತೃಪ್ತಿ ಮಲ್ಪುನ ಸಂಪ್ರದಾಯೊ ಇನಿಲಾ ತುಳುವೆರೆಟ ಉಂಡು. ಅಂಚನೆ ಪ್ರಕೃತಿಟ್ ಇಪ್ಪುನ ಗಾಳಿ, ನೀರ್, ಮಣ್ಣ್, ಕಾಡ್ ಉಂದೆನ್ ಮಾಂತ ನಂಬೊಂತ್ತಿತ್ತನ ಕಾಲೊ ಜನಪದೆರ್‍ನವು. ಐನ ರಕ್ಷಣೆಗಾತ್ ಕೆಲವೊಂಜಿ ನಂಬಿಕೆ, ಸಂಪ್ರದಾಯೊನು ಆಚರಣೆ ಮಲ್ತೊಂತಿತ್ತೆರ್. ಏತೋ ವರ್ಷೊಡ್ತಂಚಿ ಆ ಪರಂಪರೆ ಬಳತ್ತೊಂದು ಬತ್ತ್‍ತಿತ್ತ್‍ಂಡ್. ಏಪೊ ಪ್ರಕೃತಿ ಆರಾಧನೆತ ಪರಿಕಲ್ಪನೆ ತುಳುವೆರೆಟ ಕಡಮೆ ಆಂಡೋ ಆನಿಡ್ತ್‍ಂಚ್ಚಿ ಪ್ರಕೃತಿತ ಸವಾಲುಲೆನ್ ಎದುರಿಸಾವೊಡಾಯಿನ ಅನಿವಾರ್ಯಲಾ ಆಂಡ್. ಇನಿ ತೋಪಿಂಚಿ ಬಾರಿ ಬರ್ಸೊ, ಗಾಳಿ, ಗುಡ್ಡೆ ಜರಿತ್ ಬುರುನೆ, ಬೊಳ್ಳೊ ಬರ್ಪಿನ ಉಂದೆನ ಪಿರಾವು ಪ್ರಕೃತಿ ಆರಾಧನಾ ಸಂಪ್ರದಾಯೊನು ಬುಡ್ಣವೇ ಕಾರಣೊ.
ಜನಪದ ಆರಾಧನೆಟ್ ಸಮಸ್ತ ಜನಕುಲೆನ ಎಡ್ಡೆಪ್ಪು ಇತ್ತಿನ ಕಾಲೋ ಒಂಜಿ ಇತ್ತ್‍ಂಡ್. ಆಂಟ ಅವು ವೈದಿಕ ಆರಾಧನೆಯಾತ್ ಬದಲಾವಣೆ ಆಯಿನ ಕಾಲೊಟು, ಅಯಿಟ್ ಸ್ವಾರ್ಥತ ಅಂಶೋ ಜಾಸ್ತಿ ಆಂಡ್. ಅಂಚಾತ್ ಜನಕುಲೆನ ಸಮಸ್ಯೆಲುಲಾ ಜಾಸ್ತಿ ಆವೊಂತು ಬತ್ತಂಡ್. ಇನಿ ತುಳುವೆರ್‍ನ ಆರಾಧನಾ ಸಂಪ್ರದಾಯೊನು ಮರು ವಿಮರ್ಶೆ ಮಲ್ಪೊಡಾಯಿನ, ಕೆಲವೆನ್ ಬದಲಾವಣೆ ಮಲ್ಪೊಡಾಯಿನ ಅಗತ್ಯ ನಮ ದುಂಬುಂಡು. ತುಳುನಾಡ್‍ತ ಸೂಕ್ಷ್ಮಪ್ರದೇಶೋ ಬೊಕ್ಕೊ ಸೂಕ್ಷ್ಮಮನಸ್ಥಿತಿನ್ ತೆರಿವೊಂದು ನಮ ಸಂಪ್ರದಾಯೊನು ಕಟ್ಟ್‍ತ್ ಬುಲೆಪ್ಪಾವೊಡಾತ್ತ್‍ಂಡ್. ಆರಾಧನಾ ಸಂಪ್ರದಾಯೊಲು ಒವುವೇ ಆಂಟಲಾ ಅವು ಜನಪರವಾತ್ ಇಪ್ಪೊಡುಂದ್ ಪನ್ಪಿನೆನ್ ಮಾಂತಾ ತುಳುವೆರ್‍ಲಾ ತೆರಿಯೊಡಾತ್ತ್‍ಂಡ್.
(ತುಳು ಸಾಹಿತ್ಯ ಸಮ್ಮೇಳನ ಸಂಚಿಕೆ ಒಕ್ಟೋಬರ್ 2018) ಡಾ.ಸುಂದರ ಕೇನಾಜೆ
Comments
Post a Comment