ಜನಪದೆರ್ನ ಕೃಷ್ಣೆ(ಕಿಸ್ಣೆ)
ಪುರಾಣ ಪುರುಸೆರಾಯಿನ ಶಿವೆ(ಈಸ್ವರೆ), ಬ್ರಹ್ಮೆ(ಬಿರ್ಮೆರ್), ವಿಷ್ಣು(ನಾರಾಯಿಣೆ) ಈ ಮೂಜಿ ಶಕ್ತಿಲು ಜನಪದೆರ್ನ ಬಾಯಿಟ್ ಸಾಧಾರಣವಾತ್ ನಲಿತೊಂದಿಪ್ಪುನ ಪಾತ್ರೊಲು. ಈ ಮೂಜೆಟ್ ಈಸ್ವರೆ ಜನಪದೆರೆಗ್ ಬಾರಿ ಕೈತಲ್ಲ್ ಇತ್ತಿನಾಯೆ. ನಾರಾಯಣನ್ ದೇವೆರ್ನ ಸ್ವರೂಪೊಡ್‍ಲಾ, ಬಿರ್ಮೆರ್ ದೈವವಾತ್‍ಲಾ ಆರಾಧನೆ ಮಲ್ತೊಂದು ಇತ್ತಿನೆವು ಸಾಮಾನ್ಯ ವಿಷಯೊ. ಅಂಚನೇ ಶಿವನ ಅಂಶವಾಯಿನ ಬೊಕ್ಕೊ ಗಣಕ್ಕುಲಾಯಿನ ಮಸ್ತ್ ದೈವೊಲೆನ ಆರಾಧನೆ ತುಳುನಾಡ್‍ಟ್ ಇನಿಲಾ ನಡತ್ತೋಂದ್ ಇಪ್ಪುನವು ತೋಜ್‍ದ್ ಬರ್ಪುಂಡು. ಅಂಚನೆ ಬಿರ್ಮೆರೆ ಅಂಶೊತ ಸುಮಾರ್ ದೈವೊಲೆನ ಆರಾಧನೆ(ಬೆನ್ನಿ ಕಂಡೊಟು) ಜನಪದೆರ್ನ ನಡುಟು ಇತ್ತಿನವು ಇನಿಲಾ ತೋಜ್‍ದ್ ಬರ್ಪುಂಡು. ಆಂಟ ಪುರಾಣೊಟು ಬರ್ಪಿನ ವಿಷ್ಣುನ(ನಾರಾಯಣ)ಪತ್ತ್ ಅವತಾರೊನು ಯತಾವತ್ ಆರಾಧನೆ ಮಲ್ಪಿನ ಅಂಶ ತುಳುವೆರಟ ಕಡಿಮೆಂದ್ ಪನೊಲಿ. ತುಳುನಾಡ್‍ನ್À ವಿಷ್ಣುನ ಆವತಾರೊಟು ಒಂಜಾಯನ ಪರಶುರಾಮನ ಸೃಷ್ಟೀಂದ್ ಪಂಡಲಾ ಪರಶುರಾಮನ ಆರಾಧನಾ ವಿಧಾನೊಲು ತುಳುವೆರೆಟ ಇಜ್ಜಿಂದೇ ಪನಿಯೆರೆ ಸಾಧ್ಯವುಂಡು. ಬಲಿನ್ ಕೆರ್ಪುನ ವಾಮನನ ಅವತಾರೊನ್ ಬಾಲ ಬ್ರಹ್ಮಚಾರಿ ಮಾಣಿಂದ್ ಲೆತ್ತ್‍ತೆರ್, ಆಂಟ ಈ ಬಾಲ ಬ್ರಹ್ಮಚಾರಿನ ಆರಾಧನೆ ಮಲ್ಪುನ ಸಂಗತಿ ತುಳುನಾಡ್‍ಟ್ ಇಜ್ಜಿ. ಆಂಟ ಅಯಿಕ್ ವಿರುದ್ಧವಾದ್ ಅವುವೇ ಮೊಸೊಗು ತಿಕ್ಕಿನ ಬಲಿನ್ ವರ್ಸೊಗೊರೊ ನಂಬುನಂಚಿನ ಪದ್ಧತಿ ತುಳುವೆರೆಟ ತೂವೆರೆ ಸಾಧ್ಯವುಂಡು. ಅಂಚನೆ ಮರ್ಯಾದಾ ಪುರುಷೋತ್ತಮೆ ರಾಮೆ ತುಳು ಜಾನಪದೆರ್ನ ಬಾಯಿಟ್ ಇಪ್ಪುನ ದೇವೆರತ್. ತುಳುಟು ಜನಪದ ರಾಮಾಯಣತ ಬಳಕೆ ಕಡಮೆ. ಆಂಟ ಕೃಷ್ಣಾವತಾರದ ಪ್ರಸ್ತಾಪ ತುಳು ಜನಪದೆರೆಟ ಉಂಡು. ಮಸ್ತತ್ತಾಂಟಲಾ ಕೃಷ್ಣನ ವಿಷಯೊಟು ಒಂಜಿ ಕಬಿತ, ಒಂಜಿ ಆಚರಣೆ ತುಳುವೆರ್‍ನ ನಡುಟು ಇನಿಲಾ ಉಂಡು.
ತುಳುನಾಡ್ತ ಮಧ್ಯಮ ವರ್ಗದ ಜನಕುಲೆಗ್ ಕೃಷ್ಣೆ ಕೈತಲ್ಲುಪ್ಪುನ ದೇವೆರ್. ತುಳು ಜನಪದೆರ್ ಕೃಷ್ಣನ ಜನ್ಮಾಷ್ಟಮಿತ (ಅಟ್ಟೆಮಿ) ಆಚಾರಣೆನ್ ಪುರಾಕ್‍ಡ್ದೇ ಮಲ್ತೊಂದು ಬತ್ತಿನವು ತೆರಿದ್ ಬರ್ಪುಂಡು. ಕೃಷ್ಣನ್ ತುಳುವೆರ್ ಬಾಲೆ ಸಿರಿ ಕಿಸ್ಣೆಂದ್ ಲೆತಂದಿತ್ತಿನ ಕಬಿತೆಯೊಂಜಿ ಇನಿಲಾ ನಮದುಂಬುಟುಂಡು.(ಡಾ. ಪಾಲ್ತಾಡಿ ರಾಮಕೃಷ್ಣ ಆಚಾರ್ ಸಂಗ್ರಹ ಮಲ್ಲಿನ ಈ ಕಬಿತೆನ್ ಅನುಬಂಧಟ್ ತೂವೊಲಿ) ನೇಜಿತ ಕಂಡೊಟು ಈ ಕಬಿತನ್ ಪೊನ್ಜೊವುಲು ಪನೊಂದ್, ಕೆಲವು ಸರ್ತಿ ಅಯಿಕಾಪುನ ನಲಿಕೆನ್ ನಲಿತೋಂದ್ ಇತ್ತಿನವು ಉಂಡು. ಇರುವತ್ತೇಳ್ ಸಾಲ್‍ದ ಈ ಕಿನ್ಯ ಕಬಿತ ಪುರಾಣೋಟು ಶ್ರೀ ಕೃಷ್ಣನ ಅವತಾರೊದ ವಿವರಣೆ ಎಂಚ ಉಂಡೋ ಅಂಚನೇ ಪೊರ್ಲುತ ರಚನೆಯಾದ್ ಉಂಡು. ಕೃಷ್ಣನ ಪುಟ್ಟು ಬಳಪ್ಪು, ಅಯನ ಬಾಲಲೀಲೆ, ರಕ್ಕಸೆರೆನ್ ಕೆರ್ನ ಬಿರ್ಸಾದಿಗೆ, ಪಾಂಡವ ರಕ್ಷಕೆ-ಕೌರವ ನಾಶಕೆಯಾತ್ ಅಯೆ ಮಲ್ತಿನ ಬೆಲೆನ್ ಈ ಕಬಿತ ಪೊರ್ಲುಟು ಪನ್ಪುಂಡು. ಈ ಕಬಿತ ಪುರಾಣೊತ ತರ್ಜಿಮೆಂದ್ ಪನೊಳಿ. ಏರೋ ಪುರಾಣೊ ತೆರಿನ ವ್ಯಕ್ತಿನ ರಚನೆ ಉಂದು ಆತಿಪ್ಪೊಡು. ನಮ ಜನಪದೆರ್ನ ಈಸ್ವರೆ, ನಾರಾಯಣೆ ಜನಸಾಮಾನ್ಯರ್‍ನ ಮದ್ಯೊಡಿತ್ತ್‍ತ್ ಮಲ್ತಿನ ನಾನಾ ಕೆಲಸೊ ಕಜ್ಜೊಗ್‍ಲಾ ಈ ಕೃಷ್ಣೆ ಮಲ್ತಿನ ಕಜ್ಜೊಗ್ಗ್‍ಲಾ ಮಸ್ತ್ ವ್ಯತ್ಯಾಸೊ ಇಪ್ಪುನೇನ್ ಈ ಕಬಿತಟ್ ತೂಯೆರೆ ಸಾಧ್ಯವುಂಡು. ತುಳುತ ಮಾಂತ ಪಾಡ್ದನೊಡ್‍ಲಾ ಈಸ್ವರೆ ಒರಿ ಬೆನ್ನಿ ಬೆನ್ಪುನ ಸಾಗೋಳಿತಾಯೆ, ಅಯಗ್ ಮಸ್ತ್ ಕಂಡೊ, ಬೆನಿಯೆರೆ ಬೇಲೆತಕುಲು, ಬೋಂಟೆ, ಸ್ವಂತೊ ಅಡಪುನ, ಕೊಯಿಪುನ ಇಚ್ಚಿತ್ತಿ ಕೆಲಸೊಲೆನ್ ದೇವೆರಾಯಿನ ಈಸ್ವರೆಲಾ ಮಲ್ಪುನೈನ್ ತೂಯೆರೆ ಸಾದ್ಯೊ ಉಂಡು. ಅಂಚಾತ್ ಈ ದೇವೆರುಲು ಪುರಾಣತ ದೇವೆರೆನ ಸಾಲ್‍ಡ್ ಇಜ್ಜಾಂದೆ ಜನಸಾಮಾನ್ಯೆರೆನ ಸಾಲ್‍ಡ್ ಇಪ್ಪುನೆನ್ ತೂಯೆರೆ ಆಪುಂಡು. ಆಂಟ ಕೃಷ್ಣೆ ಅಂಚ ಇಜ್ಜೆ, ದಾನೆಂದ್ ಪಂಡ ಮೂಲು ಕೃಷ್ಣನ್ ಜನಪದೆರ್ ಪುರಾಣೊ ಭಾಗೊಡ್ದ್ ದೆತ್ತೋಂದೆರ್. ಪುರಾಣೊತ ಮೂಲ ಪಾಠೊನು ಅಂಚನೇ ದೀತ್ ಕಬಿತ ರಚನೆ ಮಲ್ತಿನೆನ್ ಮೂಲು ತೂವೊಲಿ. ಈ ಕಬಿತದ ವಸ್ತುಡ್‍ತ್‍ಲಾ ಅಯಿನ ರಚನೆ ಪೊರ್ಲುಟುಂಡೊಂದು ಪನೊಲಿ. ಇಡೀ ಕೃಷ್ಣನ ಲೀಲೆನ್ ಬಜೀ ಇರುವತ್ತೇಳ್ ಸಾಲ್‍ಟ್ ಪನ್ಪಿನ ತಂತ್ರೊ ಮಾತ್ರೊ ಸರಿಕಟ್ಟಾಯಿನ. ಮಲ್ಲ ಕತೆನ್ ಎಲ್ಯ ಮಲ್ತ್‍ತ್ ಅಂತ್ಯ ಪ್ರಾಸೊ ಕೊರ್ತ್ ಮಲ್ತಿನ ಈ ರಚನೆ ಬೆನ್ನಿ ಕಂಡೊಟು ಪನ್ಪಿನ ಬೇತೆ ಕಬಿತಡ್ತ್‍ಲಾ ಪೊರ್ಲುಂಡು. ಅಂಚಾದ್ ಉಂದೆನ್ನ ರಚನೆಟ್ ಶಿಷ್ಟ ಕವಿತತ ಪಾತ್ರೊಲಾ ಉಂಡೂಂದ್ ಪನೊಲಿ.
ಅಟ್ಟೆಮಿ ತುಳು ಜನಪದೆರ್ ಅನಾದಿಕಾಲೊಡ್ದ್‍ಲಾ ಆಚರಣೆ ಮಲ್ತೊಂದು ಬತ್ತಿನ ಆಚರಣೆ. ಇನಿ ನಮ ನಡುಟು ಆಚರಣೆ ಮಲ್ಪುನ ಶ್ರೀ ಕೃಷ್ಣ ಜನ್ಮಾಷ್ಟಮಿಗ್‍ಲಾ ತುಳುವೆರೆನ ಅಟ್ಟೆಮಿಗ್‍ಲಾ ವ್ಯತ್ಯಾಸೊ ಉಂಡು. ಆಂಟ ಈ ಅಟ್ಟೆಮಿತ ಆಚರಣೆಟ್ ಪುರಾಣೊತ ಪ್ರಭಾವೊ ಮಾತ್ರೊ ಗಟ್ಟಿಯಾತಿಪ್ಪುನೆನ್ ದೆತ್ತ್ ಪಾಡ್ಯೆರೆ ಸಾಧ್ಯೊ ಇಜ್ಜಿ. ಜನ್ಮಾಷ್ಟಮಿತ ದಿನೊತಾನಿಯೇ ಆಟ್ಟೆಮಿತ ಆಚರಣೆಲಾ ನಡಪುಂಡು. ಸೋಣ ತಿಂಗೊಳುತ ಪುಣ್ಣಮೆ ಕರಿನ ಎಣ್ಮ್‍ನೆ ದಿನತಾನಿ ನಡಪುನ ಅಟ್ಟೆಮಿತಾನಿ ರಾತ್ರಿ ತುಳಸಿಪೂಜೆ, ನೆಲ್ಲಿ ದೈ ನಡ್ಪುನೆ, ತುಳಸಿಗ್ ಪೇರ್ ಮೈಪುನೆ, ಚಂದ್ರನ್ ತೂಪಿನೆ, ತೊಟ್ಟಿಲ್ ತೂಕುನೆ, ಕೊಟ್ಟಿಗೆ ಪೇರ್ ತಿನ್ಪುನೆ ಉಂದು ಮಾಂತಾ ಕಡೆಟ್ ಸಾಮಾನ್ಯವಾದ್ ನಡಪುನಂಚಿನÀ ಆಚರಣೆಲು. ತುಳಸಿ ಪೂಜೆಗೆ ತುಳಸಿ ಜಲಂಧರನ ಕತೆ ಕಾರಣೋಂದ್ ಪನ್ಪೆರ್. ಜಲಂಧರನ ಬುಡೆದಿ ತುಳಸಿನ್ ಕೃಷ್ಣೆ ಮೋಕೆಮಲ್ಪನೆ ಆಲ್ ಬುಕ್ಕದ ಜನ್ಮಟು ತುಳಸಿ ದೈಯಾತ್ ಪುಟ್ಟನೆ, ಆ ದೈನ್ ನಡ್ತ್ ಐಕ್ ಆರಾಧನೆ ಮಲ್ಪಿನ ಕಲ್ಪನೆ ಮೂಲು ತೋಜುಂಡು, ಐತೊಟ್ಟುಗು ನೆಲ್ಲಿದ ದೈನ್ ನಡ್ಪುನ ಕ್ರಮೊಲಾ ಕೆಲವು ಜಾಗೆಟ್ ಉಂಡು. ಮುಲು ನೆಲ್ಲಿ ಕೃಷ್ಣನ ಸಂಕೇತೊ. ಅಂಚಾತ್ ಒಂಜಿ ಪೊಣ್ಣು(ತುಳಸಿ), ನನೊಂಜಿ ಆಣ್(ಕೃಷ್ಣೆ). ಈ ರಡ್ಡೆನ್ ಒಟ್ಟು ಸೇರ್‍ಸಾತ್ ಪೇರ್ ಮೈಪುನ ಪರಿಕಲ್ಪನೆ ಜನಪದೊಟು ಒಂಜಿ ಸೇರಿಗೆದ ಆಚರಣೆ. ಅಟ್ಟೆಮಿತಾನ ಇಲ್ಲಾಡೆತಕುಲು ಉಪವಾಸ ಇಪ್ಪುನ, ರಾತ್ರಿ ಚಂದ್ರನ್ ತೂಪಿನ ಕ್ರಮೊ ಉಂಡು. ಮಧ್ಯೊರಾತ್ರಿ ಬಾನೊಟು ಚಂದ್ರೆ ಉದಿಪನ ಆನಾಗ ಕೃಷ್ಣೆ ಪುಟ್ಯೇಂದ್ ಪುರಾಣ ಪನ್ಪುಂಡು. ಆ ಮಧ್ಯೊರಾತ್ರಿದ ಚಂದ್ರನ ಪುಟ್ಟುನೇ ಕೃಷ್ಣನ ಪುಟ್ಟುಂದು ತೆರಿಪುನ ಜನಪದರೆ ಆ ಗಳಿಗೆಗಾತ್ ತಿನಾಂದೆ ಪರಾಂದೆ ನಡುರಾತ್ರಿ ಮುಟ್ಟ ಕಾತ್ ಕುಲ್ಲುವೆರ್. ಅಯಿಡ್ದ್ ಬೊಕ್ಕೊ ಇಲ್ಲ್‍ದ ಉಲಾಯಿ ತೊಟ್ಟಿಲ್‍ಗ್ ಸಿಂಗಾರ ಮಲ್ತ್‍ದ್ ಆ ತೊಟ್ಟಿಲ್‍ಟ್ ಗೊಂಬೆನ್ ಜೆಪ್ಪಾದ್ ತೂಕುನವುಲಾ ಉಂಡು. ಇಂಚಿತ್ತಿ ಆಚರಣೆ ಮುಗಿಬುಕ್ಕೊ ಪೆಲತ್ತ ಇರೆಟ್ ಪಲ್ತಿನ ಕೊಟ್ಟಿಗೆ ಪೇರ್ ತಿಂದ್‍ದ್ ಉಪವಾಸ ಬುಡ್ಪಿನ ಕ್ರಮೊ ಕೆಲವು ಜನಾಂಗೊಳೆಟ್ ಉಂಡು.
ಅಟ್ಟೆಮಿ ಪೌರಾಣಿಕ ಪರಿಕಲ್ಪನೆತ ಭಾಗೋ ಆತ್ ಆಚರಣೆ ಮಲ್ಪಿನೈನ್ ತೂವೊಲಿ. ಅಂಚನೆ ಪುರಾಣ ಪರಿಕಲ್ಪನೆ ಇಪ್ಪುನ ಜನಾಂಗತಕುಲು ಉಂದೆನ್ ಆಚರಣೆ ಮಲ್ಪುನ ಹೆಚ್ಚಾಂದ್ ಪನೊಲಿ. ಅಂಚಾತ್ ತೀರಾ ಕೇಳವರ್ಗದ ಜನಕುಲೆನ ಆಚರಣೆಯಾದ್ ಅಟ್ಟೆಮಿ ಇಜ್ಜಾಂಡ್‍ಂದ್ ಪನಿಯೆರೆ ಸಾಧ್ಯ ಉಂಡು. ಮೂಲತಾ ತುಳಸಿ, ಪೇರ್, ಚಂದ್ರೆ, ತೊಟ್ಟಿಲ್, ಕೊಟ್ಟಿಗೆ ಉಂದು ಮಾಂತ ತೀರಾ ಕೆಳವರ್ಗತಕುಲೆನ ಅತ್ತಾಂದೆ ತುಳುನಾಡ್ತ ಮೂಲನಿವಾಸಿಲೆನ ಕೈಕ್ ತಿಕ್ಕೊಂತಿತ್ತಿನ ವಸ್ತುಲತ್ತ. ಅಂಚನೆ ಕೃಷ್ಣನ ಕತೆಲಾ ಜನಸಾಮಾನ್ಯಗ್ ಆತ್ ಬೇಕೊ ಅರ್ಥ ಆಪಿ ಕತೆಲಾ ಅತ್ತ್. ಜನಸಾಮಾನ್ಯೆರೆನ ನಡುಟು ಇತ್ತ್‍ದ್ ಸಾಹಸ ಮಲ್ಪುನ ಈಸ್ವರೆ, ಮಿತ್ತಮಿರಿ ಲೋಕದ ನಾರಾಯಣ ದೇವೆರೆ ಲೆಕ್ಕೊ ಕೃಷ್ಣನ ಸಾಧನೆ ಅತ್ತ್À. ಅಯನ ಮಾಂತಾ ಕೆಲಸೊಲು ಮಧ್ಯಮ ಬೊಕ್ಕ ಮೇಲ್ವರ್ಗತ ಜನಕುಲೆನ ನಡುಟು ಆಯಿನಂಚಿನವು. ಅಂಚಾದ್ ತುಳುನಾಡ್ತ ಕೆಳವರ್ಗದಕುಲು ಇಂಚಿತ್ತಿ ಆಚರಣೆನ್ ಮಲ್ತಿನ ಕಡಿಮೆಂದೇ ಪನೋಲಿ. ತುಳು ಜನಪದೆರೆನ ಮಾಂತಾ ದೈವೊ ದೇವೆರೆಗ್ ಪ್ರತ್ಯೇಕ ಅಸ್ಥಿತ್ವೊ ಇತ್ತ್‍ಂಡಲಾ ವಿಷ್ಣನ ಹತ್ತ್ ಅವತಾರೊದ ಶಿಷ್ಟ ದೇವೆರೆಗ್ ಪ್ರತ್ಯೇಕ ಅಸ್ಥಿತ್ವೊ ಇತ್ತಿ ಲೆಕ್ಕೊ ತೋಜಿತ್ ಬರ್ಪುಜಿ. ಅಂಚಾದ್ ರಾಮೆ, ಕೃಷ್ಣೆ, ಪರಶುರಾಮೆ, ವಾಮನೆ, ಮತ್ಸ, ಕೂರ್ಮ, ಕಲ್ಕಿ ಇಂಚಿತ್ತಿ ದೇವೆರೆನ ತುಳು ಜನಪದ ಸಾಹಿತ್ಯೊ, ಆಚರಣೆ, ನಂಬಿಕೆ ತುಳುನಾಡ್‍ಟ್ ಕಡಿಮೆಂದ್ ಪನಿಯರೆ ಸಾಧ್ಯ ಉಂಡು. ಅತ್ತಾಂತೆ ಈ ವಿಷಯದ ಬಗ್ಗೆ ನನಲಾ ಅಧ್ಯಯನ ಮಾಲ್ಪಿಯರೆ ಅವಕಾಶ ಉಂಡು.
ಬಾಲೆ ಸಿರಿ ಕೃಷ್ಣೆ ಕಬಿತ
ತಾನ ತಾನ ತಾನ ನಾನಾನ
ಬೇವಕ್ಯಮ್ಮ ಕರ್ಪಿಲ್ಲ್‍ಡ್ ಬಾಲೆ ಪೆದ್‍ತೇರಾ
ವಸುದೇವೆ ನಂದಗೋಕ್ಲೊಗು ಕನತ್ ಕೊರ್ತೆರಾ
ಬಾಲೆ ಕೃಷ್ಣೆ ಪಂಡ್‍ದಾಯಗ್ ಪುದರ್ ದೀತೇರಾ
ಸೂಕೊ ನೀರ್‍ಗೊ ವಡ್ಡರೋಡು ಆಯೆ ಬಳತೇನೋ
ತಾನ ತಾನ ತಾನ ನಾನಾನ 1
ಎಲ್ಯೆ ಪೋದು ಮಲ್ಲೆ ಲಾತೇನೋ
ತಂಟೆ ಉಪ್ರಾಳಿ ಆಯೆ ಮಲ್ತೇನೋ
ಇಸೊತ ಮಿರೆತ ಪೂತನಿನ್ಲಾ
ಪೇರ್ ಜುಂಬುದು ಆಯೆ ಕೆರ್ಯೇನೋ
ತಾನ ತಾನ ತಾನ ನಾನಾನ 2
ಪೆತ್ತ ಕಯಿಕಂಜಿ ಆಯೆ ಸಾಂಕ್ಯೇನೋ
ಗೋಪಾಲೇಂದ್ ಪುದರ್ ಕೇಂಡೇನೋ
ಪೇರ್ ಪರ್ದ್ ನೆಯಿನ್ ತಿಂದನೋ
ತಾನ ತಾನ ತಾನ ನಾನಾನ 3
ಮಣ್ಣ್ ತಿಂದ್‍ದ್ ಬಾಯಿ ಅಂಗಾಯೆ
ಮೂಜಿಲೋಕೊನು ಅಪ್ಪೆಗ್ ತೋಜಾಯೆ
ಪೊಣ್ಣು ಜೋಕುಲೆ ಸೀರೆ ಒಯ್ತೇಗೆ
ಕಣ್ಣ್ ಮಚ್ಚಿದ್ ಮುತ್ತೊ ಕೊರ್ಯೇಗೆ
ತಾನ ತಾನ ತಾನ ನಾನಾನ 4
ಏಳ್‍ಜಿಡೆತ ಸಂಕ ಪಾಲಾನ್
ಆಯೆ ತೊರ್ತುದು ನಲಿಕೆ ನಲಿತೇನ
ನಾಲ್ ಬಿರೆಳ್‍ಡ್ ಗುಡ್ಡೆ ದೆರ್ತೆನೋ
ಬಾರಿ ಬರ್ಸೊಡು ಎರ್ಲೆ ನಕಾತೇನೊ
ತಾನ ತಾನ ತಾನ ನಾನಾನ 5
ಅಪ್ಪೆ ಅಮ್ಮನ್ ಪೊರ್ಲು ತಾಂಕ್ಯೇನೊ
ಮಾಮ ಕಂಸನ್ ಗುದ್ದುದು ಕೆರ್ಯೇನೊ
ದ್ವಾಪರೋದ ದೇವೆರಾಯೆಲಾ
ದ್ವಾರಕೇನ್ ಆಳೊಂದಿತ್ತೇನಾ
ತಾನ ತಾನ ತಾನ ನಾನಾನ 6
ಪಾಂಡವೆರೆನ್ ಆಯೆ ಕಾತೇಲಾ
ಕೌರವೆರೆನ ಪಡೆನ್ ಮುತ್ಯೇಲಾ
ಸತ್ಯಬಾಮೆ ರುಕುಣಿ ಬುಡೆದ್ಯರ್ಲು
ಸತ್ಯ ಧರ್ಮೊ ಒರಿತೊಂಡೆ ಪೊರ್ಲು
ತಾನ ತಾನ ತಾನ ನಾನಾನ 7
ಡಾ.ಸುಂದರ ಕೇನಾಜೆ
ಪುರಾಣ ಪುರುಸೆರಾಯಿನ ಶಿವೆ(ಈಸ್ವರೆ), ಬ್ರಹ್ಮೆ(ಬಿರ್ಮೆರ್), ವಿಷ್ಣು(ನಾರಾಯಿಣೆ) ಈ ಮೂಜಿ ಶಕ್ತಿಲು ಜನಪದೆರ್ನ ಬಾಯಿಟ್ ಸಾಧಾರಣವಾತ್ ನಲಿತೊಂದಿಪ್ಪುನ ಪಾತ್ರೊಲು. ಈ ಮೂಜೆಟ್ ಈಸ್ವರೆ ಜನಪದೆರೆಗ್ ಬಾರಿ ಕೈತಲ್ಲ್ ಇತ್ತಿನಾಯೆ. ನಾರಾಯಣನ್ ದೇವೆರ್ನ ಸ್ವರೂಪೊಡ್‍ಲಾ, ಬಿರ್ಮೆರ್ ದೈವವಾತ್‍ಲಾ ಆರಾಧನೆ ಮಲ್ತೊಂದು ಇತ್ತಿನೆವು ಸಾಮಾನ್ಯ ವಿಷಯೊ. ಅಂಚನೇ ಶಿವನ ಅಂಶವಾಯಿನ ಬೊಕ್ಕೊ ಗಣಕ್ಕುಲಾಯಿನ ಮಸ್ತ್ ದೈವೊಲೆನ ಆರಾಧನೆ ತುಳುನಾಡ್‍ಟ್ ಇನಿಲಾ ನಡತ್ತೋಂದ್ ಇಪ್ಪುನವು ತೋಜ್‍ದ್ ಬರ್ಪುಂಡು. ಅಂಚನೆ ಬಿರ್ಮೆರೆ ಅಂಶೊತ ಸುಮಾರ್ ದೈವೊಲೆನ ಆರಾಧನೆ(ಬೆನ್ನಿ ಕಂಡೊಟು) ಜನಪದೆರ್ನ ನಡುಟು ಇತ್ತಿನವು ಇನಿಲಾ ತೋಜ್‍ದ್ ಬರ್ಪುಂಡು. ಆಂಟ ಪುರಾಣೊಟು ಬರ್ಪಿನ ವಿಷ್ಣುನ(ನಾರಾಯಣ)ಪತ್ತ್ ಅವತಾರೊನು ಯತಾವತ್ ಆರಾಧನೆ ಮಲ್ಪಿನ ಅಂಶ ತುಳುವೆರಟ ಕಡಿಮೆಂದ್ ಪನೊಲಿ. ತುಳುನಾಡ್‍ನ್À ವಿಷ್ಣುನ ಆವತಾರೊಟು ಒಂಜಾಯನ ಪರಶುರಾಮನ ಸೃಷ್ಟೀಂದ್ ಪಂಡಲಾ ಪರಶುರಾಮನ ಆರಾಧನಾ ವಿಧಾನೊಲು ತುಳುವೆರೆಟ ಇಜ್ಜಿಂದೇ ಪನಿಯೆರೆ ಸಾಧ್ಯವುಂಡು. ಬಲಿನ್ ಕೆರ್ಪುನ ವಾಮನನ ಅವತಾರೊನ್ ಬಾಲ ಬ್ರಹ್ಮಚಾರಿ ಮಾಣಿಂದ್ ಲೆತ್ತ್‍ತೆರ್, ಆಂಟ ಈ ಬಾಲ ಬ್ರಹ್ಮಚಾರಿನ ಆರಾಧನೆ ಮಲ್ಪುನ ಸಂಗತಿ ತುಳುನಾಡ್‍ಟ್ ಇಜ್ಜಿ. ಆಂಟ ಅಯಿಕ್ ವಿರುದ್ಧವಾದ್ ಅವುವೇ ಮೊಸೊಗು ತಿಕ್ಕಿನ ಬಲಿನ್ ವರ್ಸೊಗೊರೊ ನಂಬುನಂಚಿನ ಪದ್ಧತಿ ತುಳುವೆರೆಟ ತೂವೆರೆ ಸಾಧ್ಯವುಂಡು. ಅಂಚನೆ ಮರ್ಯಾದಾ ಪುರುಷೋತ್ತಮೆ ರಾಮೆ ತುಳು ಜಾನಪದೆರ್ನ ಬಾಯಿಟ್ ಇಪ್ಪುನ ದೇವೆರತ್. ತುಳುಟು ಜನಪದ ರಾಮಾಯಣತ ಬಳಕೆ ಕಡಮೆ. ಆಂಟ ಕೃಷ್ಣಾವತಾರದ ಪ್ರಸ್ತಾಪ ತುಳು ಜನಪದೆರೆಟ ಉಂಡು. ಮಸ್ತತ್ತಾಂಟಲಾ ಕೃಷ್ಣನ ವಿಷಯೊಟು ಒಂಜಿ ಕಬಿತ, ಒಂಜಿ ಆಚರಣೆ ತುಳುವೆರ್‍ನ ನಡುಟು ಇನಿಲಾ ಉಂಡು.
ತುಳುನಾಡ್ತ ಮಧ್ಯಮ ವರ್ಗದ ಜನಕುಲೆಗ್ ಕೃಷ್ಣೆ ಕೈತಲ್ಲುಪ್ಪುನ ದೇವೆರ್. ತುಳು ಜನಪದೆರ್ ಕೃಷ್ಣನ ಜನ್ಮಾಷ್ಟಮಿತ (ಅಟ್ಟೆಮಿ) ಆಚಾರಣೆನ್ ಪುರಾಕ್‍ಡ್ದೇ ಮಲ್ತೊಂದು ಬತ್ತಿನವು ತೆರಿದ್ ಬರ್ಪುಂಡು. ಕೃಷ್ಣನ್ ತುಳುವೆರ್ ಬಾಲೆ ಸಿರಿ ಕಿಸ್ಣೆಂದ್ ಲೆತಂದಿತ್ತಿನ ಕಬಿತೆಯೊಂಜಿ ಇನಿಲಾ ನಮದುಂಬುಟುಂಡು.(ಡಾ. ಪಾಲ್ತಾಡಿ ರಾಮಕೃಷ್ಣ ಆಚಾರ್ ಸಂಗ್ರಹ ಮಲ್ಲಿನ ಈ ಕಬಿತೆನ್ ಅನುಬಂಧಟ್ ತೂವೊಲಿ) ನೇಜಿತ ಕಂಡೊಟು ಈ ಕಬಿತನ್ ಪೊನ್ಜೊವುಲು ಪನೊಂದ್, ಕೆಲವು ಸರ್ತಿ ಅಯಿಕಾಪುನ ನಲಿಕೆನ್ ನಲಿತೋಂದ್ ಇತ್ತಿನವು ಉಂಡು. ಇರುವತ್ತೇಳ್ ಸಾಲ್‍ದ ಈ ಕಿನ್ಯ ಕಬಿತ ಪುರಾಣೋಟು ಶ್ರೀ ಕೃಷ್ಣನ ಅವತಾರೊದ ವಿವರಣೆ ಎಂಚ ಉಂಡೋ ಅಂಚನೇ ಪೊರ್ಲುತ ರಚನೆಯಾದ್ ಉಂಡು. ಕೃಷ್ಣನ ಪುಟ್ಟು ಬಳಪ್ಪು, ಅಯನ ಬಾಲಲೀಲೆ, ರಕ್ಕಸೆರೆನ್ ಕೆರ್ನ ಬಿರ್ಸಾದಿಗೆ, ಪಾಂಡವ ರಕ್ಷಕೆ-ಕೌರವ ನಾಶಕೆಯಾತ್ ಅಯೆ ಮಲ್ತಿನ ಬೆಲೆನ್ ಈ ಕಬಿತ ಪೊರ್ಲುಟು ಪನ್ಪುಂಡು. ಈ ಕಬಿತ ಪುರಾಣೊತ ತರ್ಜಿಮೆಂದ್ ಪನೊಳಿ. ಏರೋ ಪುರಾಣೊ ತೆರಿನ ವ್ಯಕ್ತಿನ ರಚನೆ ಉಂದು ಆತಿಪ್ಪೊಡು. ನಮ ಜನಪದೆರ್ನ ಈಸ್ವರೆ, ನಾರಾಯಣೆ ಜನಸಾಮಾನ್ಯರ್‍ನ ಮದ್ಯೊಡಿತ್ತ್‍ತ್ ಮಲ್ತಿನ ನಾನಾ ಕೆಲಸೊ ಕಜ್ಜೊಗ್‍ಲಾ ಈ ಕೃಷ್ಣೆ ಮಲ್ತಿನ ಕಜ್ಜೊಗ್ಗ್‍ಲಾ ಮಸ್ತ್ ವ್ಯತ್ಯಾಸೊ ಇಪ್ಪುನೇನ್ ಈ ಕಬಿತಟ್ ತೂಯೆರೆ ಸಾಧ್ಯವುಂಡು. ತುಳುತ ಮಾಂತ ಪಾಡ್ದನೊಡ್‍ಲಾ ಈಸ್ವರೆ ಒರಿ ಬೆನ್ನಿ ಬೆನ್ಪುನ ಸಾಗೋಳಿತಾಯೆ, ಅಯಗ್ ಮಸ್ತ್ ಕಂಡೊ, ಬೆನಿಯೆರೆ ಬೇಲೆತಕುಲು, ಬೋಂಟೆ, ಸ್ವಂತೊ ಅಡಪುನ, ಕೊಯಿಪುನ ಇಚ್ಚಿತ್ತಿ ಕೆಲಸೊಲೆನ್ ದೇವೆರಾಯಿನ ಈಸ್ವರೆಲಾ ಮಲ್ಪುನೈನ್ ತೂಯೆರೆ ಸಾದ್ಯೊ ಉಂಡು. ಅಂಚಾತ್ ಈ ದೇವೆರುಲು ಪುರಾಣತ ದೇವೆರೆನ ಸಾಲ್‍ಡ್ ಇಜ್ಜಾಂದೆ ಜನಸಾಮಾನ್ಯೆರೆನ ಸಾಲ್‍ಡ್ ಇಪ್ಪುನೆನ್ ತೂಯೆರೆ ಆಪುಂಡು. ಆಂಟ ಕೃಷ್ಣೆ ಅಂಚ ಇಜ್ಜೆ, ದಾನೆಂದ್ ಪಂಡ ಮೂಲು ಕೃಷ್ಣನ್ ಜನಪದೆರ್ ಪುರಾಣೊ ಭಾಗೊಡ್ದ್ ದೆತ್ತೋಂದೆರ್. ಪುರಾಣೊತ ಮೂಲ ಪಾಠೊನು ಅಂಚನೇ ದೀತ್ ಕಬಿತ ರಚನೆ ಮಲ್ತಿನೆನ್ ಮೂಲು ತೂವೊಲಿ. ಈ ಕಬಿತದ ವಸ್ತುಡ್‍ತ್‍ಲಾ ಅಯಿನ ರಚನೆ ಪೊರ್ಲುಟುಂಡೊಂದು ಪನೊಲಿ. ಇಡೀ ಕೃಷ್ಣನ ಲೀಲೆನ್ ಬಜೀ ಇರುವತ್ತೇಳ್ ಸಾಲ್‍ಟ್ ಪನ್ಪಿನ ತಂತ್ರೊ ಮಾತ್ರೊ ಸರಿಕಟ್ಟಾಯಿನ. ಮಲ್ಲ ಕತೆನ್ ಎಲ್ಯ ಮಲ್ತ್‍ತ್ ಅಂತ್ಯ ಪ್ರಾಸೊ ಕೊರ್ತ್ ಮಲ್ತಿನ ಈ ರಚನೆ ಬೆನ್ನಿ ಕಂಡೊಟು ಪನ್ಪಿನ ಬೇತೆ ಕಬಿತಡ್ತ್‍ಲಾ ಪೊರ್ಲುಂಡು. ಅಂಚಾದ್ ಉಂದೆನ್ನ ರಚನೆಟ್ ಶಿಷ್ಟ ಕವಿತತ ಪಾತ್ರೊಲಾ ಉಂಡೂಂದ್ ಪನೊಲಿ.
ಅಟ್ಟೆಮಿ ತುಳು ಜನಪದೆರ್ ಅನಾದಿಕಾಲೊಡ್ದ್‍ಲಾ ಆಚರಣೆ ಮಲ್ತೊಂದು ಬತ್ತಿನ ಆಚರಣೆ. ಇನಿ ನಮ ನಡುಟು ಆಚರಣೆ ಮಲ್ಪುನ ಶ್ರೀ ಕೃಷ್ಣ ಜನ್ಮಾಷ್ಟಮಿಗ್‍ಲಾ ತುಳುವೆರೆನ ಅಟ್ಟೆಮಿಗ್‍ಲಾ ವ್ಯತ್ಯಾಸೊ ಉಂಡು. ಆಂಟ ಈ ಅಟ್ಟೆಮಿತ ಆಚರಣೆಟ್ ಪುರಾಣೊತ ಪ್ರಭಾವೊ ಮಾತ್ರೊ ಗಟ್ಟಿಯಾತಿಪ್ಪುನೆನ್ ದೆತ್ತ್ ಪಾಡ್ಯೆರೆ ಸಾಧ್ಯೊ ಇಜ್ಜಿ. ಜನ್ಮಾಷ್ಟಮಿತ ದಿನೊತಾನಿಯೇ ಆಟ್ಟೆಮಿತ ಆಚರಣೆಲಾ ನಡಪುಂಡು. ಸೋಣ ತಿಂಗೊಳುತ ಪುಣ್ಣಮೆ ಕರಿನ ಎಣ್ಮ್‍ನೆ ದಿನತಾನಿ ನಡಪುನ ಅಟ್ಟೆಮಿತಾನಿ ರಾತ್ರಿ ತುಳಸಿಪೂಜೆ, ನೆಲ್ಲಿ ದೈ ನಡ್ಪುನೆ, ತುಳಸಿಗ್ ಪೇರ್ ಮೈಪುನೆ, ಚಂದ್ರನ್ ತೂಪಿನೆ, ತೊಟ್ಟಿಲ್ ತೂಕುನೆ, ಕೊಟ್ಟಿಗೆ ಪೇರ್ ತಿನ್ಪುನೆ ಉಂದು ಮಾಂತಾ ಕಡೆಟ್ ಸಾಮಾನ್ಯವಾದ್ ನಡಪುನಂಚಿನÀ ಆಚರಣೆಲು. ತುಳಸಿ ಪೂಜೆಗೆ ತುಳಸಿ ಜಲಂಧರನ ಕತೆ ಕಾರಣೋಂದ್ ಪನ್ಪೆರ್. ಜಲಂಧರನ ಬುಡೆದಿ ತುಳಸಿನ್ ಕೃಷ್ಣೆ ಮೋಕೆಮಲ್ಪನೆ ಆಲ್ ಬುಕ್ಕದ ಜನ್ಮಟು ತುಳಸಿ ದೈಯಾತ್ ಪುಟ್ಟನೆ, ಆ ದೈನ್ ನಡ್ತ್ ಐಕ್ ಆರಾಧನೆ ಮಲ್ಪಿನ ಕಲ್ಪನೆ ಮೂಲು ತೋಜುಂಡು, ಐತೊಟ್ಟುಗು ನೆಲ್ಲಿದ ದೈನ್ ನಡ್ಪುನ ಕ್ರಮೊಲಾ ಕೆಲವು ಜಾಗೆಟ್ ಉಂಡು. ಮುಲು ನೆಲ್ಲಿ ಕೃಷ್ಣನ ಸಂಕೇತೊ. ಅಂಚಾತ್ ಒಂಜಿ ಪೊಣ್ಣು(ತುಳಸಿ), ನನೊಂಜಿ ಆಣ್(ಕೃಷ್ಣೆ). ಈ ರಡ್ಡೆನ್ ಒಟ್ಟು ಸೇರ್‍ಸಾತ್ ಪೇರ್ ಮೈಪುನ ಪರಿಕಲ್ಪನೆ ಜನಪದೊಟು ಒಂಜಿ ಸೇರಿಗೆದ ಆಚರಣೆ. ಅಟ್ಟೆಮಿತಾನ ಇಲ್ಲಾಡೆತಕುಲು ಉಪವಾಸ ಇಪ್ಪುನ, ರಾತ್ರಿ ಚಂದ್ರನ್ ತೂಪಿನ ಕ್ರಮೊ ಉಂಡು. ಮಧ್ಯೊರಾತ್ರಿ ಬಾನೊಟು ಚಂದ್ರೆ ಉದಿಪನ ಆನಾಗ ಕೃಷ್ಣೆ ಪುಟ್ಯೇಂದ್ ಪುರಾಣ ಪನ್ಪುಂಡು. ಆ ಮಧ್ಯೊರಾತ್ರಿದ ಚಂದ್ರನ ಪುಟ್ಟುನೇ ಕೃಷ್ಣನ ಪುಟ್ಟುಂದು ತೆರಿಪುನ ಜನಪದರೆ ಆ ಗಳಿಗೆಗಾತ್ ತಿನಾಂದೆ ಪರಾಂದೆ ನಡುರಾತ್ರಿ ಮುಟ್ಟ ಕಾತ್ ಕುಲ್ಲುವೆರ್. ಅಯಿಡ್ದ್ ಬೊಕ್ಕೊ ಇಲ್ಲ್‍ದ ಉಲಾಯಿ ತೊಟ್ಟಿಲ್‍ಗ್ ಸಿಂಗಾರ ಮಲ್ತ್‍ದ್ ಆ ತೊಟ್ಟಿಲ್‍ಟ್ ಗೊಂಬೆನ್ ಜೆಪ್ಪಾದ್ ತೂಕುನವುಲಾ ಉಂಡು. ಇಂಚಿತ್ತಿ ಆಚರಣೆ ಮುಗಿಬುಕ್ಕೊ ಪೆಲತ್ತ ಇರೆಟ್ ಪಲ್ತಿನ ಕೊಟ್ಟಿಗೆ ಪೇರ್ ತಿಂದ್‍ದ್ ಉಪವಾಸ ಬುಡ್ಪಿನ ಕ್ರಮೊ ಕೆಲವು ಜನಾಂಗೊಳೆಟ್ ಉಂಡು.
ಅಟ್ಟೆಮಿ ಪೌರಾಣಿಕ ಪರಿಕಲ್ಪನೆತ ಭಾಗೋ ಆತ್ ಆಚರಣೆ ಮಲ್ಪಿನೈನ್ ತೂವೊಲಿ. ಅಂಚನೆ ಪುರಾಣ ಪರಿಕಲ್ಪನೆ ಇಪ್ಪುನ ಜನಾಂಗತಕುಲು ಉಂದೆನ್ ಆಚರಣೆ ಮಲ್ಪುನ ಹೆಚ್ಚಾಂದ್ ಪನೊಲಿ. ಅಂಚಾತ್ ತೀರಾ ಕೇಳವರ್ಗದ ಜನಕುಲೆನ ಆಚರಣೆಯಾದ್ ಅಟ್ಟೆಮಿ ಇಜ್ಜಾಂಡ್‍ಂದ್ ಪನಿಯೆರೆ ಸಾಧ್ಯ ಉಂಡು. ಮೂಲತಾ ತುಳಸಿ, ಪೇರ್, ಚಂದ್ರೆ, ತೊಟ್ಟಿಲ್, ಕೊಟ್ಟಿಗೆ ಉಂದು ಮಾಂತ ತೀರಾ ಕೆಳವರ್ಗತಕುಲೆನ ಅತ್ತಾಂದೆ ತುಳುನಾಡ್ತ ಮೂಲನಿವಾಸಿಲೆನ ಕೈಕ್ ತಿಕ್ಕೊಂತಿತ್ತಿನ ವಸ್ತುಲತ್ತ. ಅಂಚನೆ ಕೃಷ್ಣನ ಕತೆಲಾ ಜನಸಾಮಾನ್ಯಗ್ ಆತ್ ಬೇಕೊ ಅರ್ಥ ಆಪಿ ಕತೆಲಾ ಅತ್ತ್. ಜನಸಾಮಾನ್ಯೆರೆನ ನಡುಟು ಇತ್ತ್‍ದ್ ಸಾಹಸ ಮಲ್ಪುನ ಈಸ್ವರೆ, ಮಿತ್ತಮಿರಿ ಲೋಕದ ನಾರಾಯಣ ದೇವೆರೆ ಲೆಕ್ಕೊ ಕೃಷ್ಣನ ಸಾಧನೆ ಅತ್ತ್À. ಅಯನ ಮಾಂತಾ ಕೆಲಸೊಲು ಮಧ್ಯಮ ಬೊಕ್ಕ ಮೇಲ್ವರ್ಗತ ಜನಕುಲೆನ ನಡುಟು ಆಯಿನಂಚಿನವು. ಅಂಚಾದ್ ತುಳುನಾಡ್ತ ಕೆಳವರ್ಗದಕುಲು ಇಂಚಿತ್ತಿ ಆಚರಣೆನ್ ಮಲ್ತಿನ ಕಡಿಮೆಂದೇ ಪನೋಲಿ. ತುಳು ಜನಪದೆರೆನ ಮಾಂತಾ ದೈವೊ ದೇವೆರೆಗ್ ಪ್ರತ್ಯೇಕ ಅಸ್ಥಿತ್ವೊ ಇತ್ತ್‍ಂಡಲಾ ವಿಷ್ಣನ ಹತ್ತ್ ಅವತಾರೊದ ಶಿಷ್ಟ ದೇವೆರೆಗ್ ಪ್ರತ್ಯೇಕ ಅಸ್ಥಿತ್ವೊ ಇತ್ತಿ ಲೆಕ್ಕೊ ತೋಜಿತ್ ಬರ್ಪುಜಿ. ಅಂಚಾದ್ ರಾಮೆ, ಕೃಷ್ಣೆ, ಪರಶುರಾಮೆ, ವಾಮನೆ, ಮತ್ಸ, ಕೂರ್ಮ, ಕಲ್ಕಿ ಇಂಚಿತ್ತಿ ದೇವೆರೆನ ತುಳು ಜನಪದ ಸಾಹಿತ್ಯೊ, ಆಚರಣೆ, ನಂಬಿಕೆ ತುಳುನಾಡ್‍ಟ್ ಕಡಿಮೆಂದ್ ಪನಿಯರೆ ಸಾಧ್ಯ ಉಂಡು. ಅತ್ತಾಂತೆ ಈ ವಿಷಯದ ಬಗ್ಗೆ ನನಲಾ ಅಧ್ಯಯನ ಮಾಲ್ಪಿಯರೆ ಅವಕಾಶ ಉಂಡು.
ಬಾಲೆ ಸಿರಿ ಕೃಷ್ಣೆ ಕಬಿತ
ತಾನ ತಾನ ತಾನ ನಾನಾನ
ಬೇವಕ್ಯಮ್ಮ ಕರ್ಪಿಲ್ಲ್‍ಡ್ ಬಾಲೆ ಪೆದ್‍ತೇರಾ
ವಸುದೇವೆ ನಂದಗೋಕ್ಲೊಗು ಕನತ್ ಕೊರ್ತೆರಾ
ಬಾಲೆ ಕೃಷ್ಣೆ ಪಂಡ್‍ದಾಯಗ್ ಪುದರ್ ದೀತೇರಾ
ಸೂಕೊ ನೀರ್‍ಗೊ ವಡ್ಡರೋಡು ಆಯೆ ಬಳತೇನೋ
ತಾನ ತಾನ ತಾನ ನಾನಾನ 1
ಎಲ್ಯೆ ಪೋದು ಮಲ್ಲೆ ಲಾತೇನೋ
ತಂಟೆ ಉಪ್ರಾಳಿ ಆಯೆ ಮಲ್ತೇನೋ
ಇಸೊತ ಮಿರೆತ ಪೂತನಿನ್ಲಾ
ಪೇರ್ ಜುಂಬುದು ಆಯೆ ಕೆರ್ಯೇನೋ
ತಾನ ತಾನ ತಾನ ನಾನಾನ 2
ಪೆತ್ತ ಕಯಿಕಂಜಿ ಆಯೆ ಸಾಂಕ್ಯೇನೋ
ಗೋಪಾಲೇಂದ್ ಪುದರ್ ಕೇಂಡೇನೋ
ಪೇರ್ ಪರ್ದ್ ನೆಯಿನ್ ತಿಂದನೋ
ತಾನ ತಾನ ತಾನ ನಾನಾನ 3
ಮಣ್ಣ್ ತಿಂದ್‍ದ್ ಬಾಯಿ ಅಂಗಾಯೆ
ಮೂಜಿಲೋಕೊನು ಅಪ್ಪೆಗ್ ತೋಜಾಯೆ
ಪೊಣ್ಣು ಜೋಕುಲೆ ಸೀರೆ ಒಯ್ತೇಗೆ
ಕಣ್ಣ್ ಮಚ್ಚಿದ್ ಮುತ್ತೊ ಕೊರ್ಯೇಗೆ
ತಾನ ತಾನ ತಾನ ನಾನಾನ 4
ಏಳ್‍ಜಿಡೆತ ಸಂಕ ಪಾಲಾನ್
ಆಯೆ ತೊರ್ತುದು ನಲಿಕೆ ನಲಿತೇನ
ನಾಲ್ ಬಿರೆಳ್‍ಡ್ ಗುಡ್ಡೆ ದೆರ್ತೆನೋ
ಬಾರಿ ಬರ್ಸೊಡು ಎರ್ಲೆ ನಕಾತೇನೊ
ತಾನ ತಾನ ತಾನ ನಾನಾನ 5
ಅಪ್ಪೆ ಅಮ್ಮನ್ ಪೊರ್ಲು ತಾಂಕ್ಯೇನೊ
ಮಾಮ ಕಂಸನ್ ಗುದ್ದುದು ಕೆರ್ಯೇನೊ
ದ್ವಾಪರೋದ ದೇವೆರಾಯೆಲಾ
ದ್ವಾರಕೇನ್ ಆಳೊಂದಿತ್ತೇನಾ
ತಾನ ತಾನ ತಾನ ನಾನಾನ 6
ಪಾಂಡವೆರೆನ್ ಆಯೆ ಕಾತೇಲಾ
ಕೌರವೆರೆನ ಪಡೆನ್ ಮುತ್ಯೇಲಾ
ಸತ್ಯಬಾಮೆ ರುಕುಣಿ ಬುಡೆದ್ಯರ್ಲು
ಸತ್ಯ ಧರ್ಮೊ ಒರಿತೊಂಡೆ ಪೊರ್ಲು
ತಾನ ತಾನ ತಾನ ನಾನಾನ 7
ಡಾ.ಸುಂದರ ಕೇನಾಜೆ
Comments
Post a Comment