ತುಳು ಪರಿಚಯ - ಸುಂದರ ಕೇನಾಜೆ

ಡಾ.ಸುಂದರ ಕೇನಾಜೆ

1998ನೇ ಇಸವಿಡ್ದ್ ಸುಳ್ಯ-ಪುತ್ತೂರು ಜಾನಪದ ಕೂಡುಕಟ್ಟ್‍ತ ಸ್ಥಾಪಕ ಕಾರ್ಯಂತೆ ಆತ್ ತುಳು ಕಜ್ಜೊ ಕಾರ್ಯೊಗು ಸುರುಮಲ್ತಿನ ಡಾ.ಸುಂದರ ಕೇನಾಜೆ ಸುಳ್ಯ ಪುತ್ತೂರು ತಾಲೂಕುಟು ಮಸ್ತ್ ಜಾನಪದ ಪರ್ಬೊಲೆನ್, ಆಚರಣೆಲುನೆ ಸಂಘಟನೆ ಮಾಲ್ತ್‍ತೆರ್. ಡಾ.ಪಾಲ್ತಾಡಿ ರಾಮಕೃಷ್ಣ ಆಚಾರ್‍ಲು ಈ ಕೂಡುಕಟ್ಟ್‍ತ ಗುರಿಕ್ಕಾರಿಗೆಟ್ ಆಟಿ ಉಚ್ಚವೊ, ಕೆಡ್ಡಸ ಕೂಡೋ, ಬಿಸು ಪರ್ಬೊ ಇಂಚಿತ್ತಿ ಲೇಸ್‍ಲೆನ್ ದುಗ್ಗಲಡ್ಕ, ಮಂಡೆಕೋಲು, ಕಮಿಲ, ಗುತ್ತಿಗಾರ್, ಪೆರುವಾಜೆ, ಸವಣೂರು, ಸುಳ್ಯೊಟು ಪ್ರತಿ ವರ್ಷ ಆಚರಣೆ ಮಲ್ತೊಂದು ಬತ್ತ್‍ತೇರ್, ಇರುವೊ ವರ್ಷೊಗು ದುಂಬು ಸುರು ಮಾಲ್ತಿನ ಈ ಕಾರ್ಯಕ್ರಮೊಲು ಇನಿಲಾ ಸುಳ್ಯ-ಪುತ್ತೂರು ತಾಲೂಕುತ ಅಲ್ಲಲ್ ಮಸ್ತ್ ನಡತ್ತೊಂದುಂಡು. ತುಳುನಾಡ್‍ತ ಬಿನ್ನಿ ಬೇಸಾಯತ ಬಗ್ಗೆ 2000ನೇ ಇಸವಿಟ್ ಪಿಎಚ್.ಡಿ ಅಧ್ಯಯನೊಗು ಸುರು ಮಾಲ್ತ್‍ತ್, ಸುಮಾರು ಆಜಿ ವರ್ಷೊ ತುಳುನಾಡ್ ಪೂರ್ತಿ ಸುತ್ತ್‍ತ್ ಬೆನ್ನಿ ಸಂಬಂಧ ಪಟ್ಟ್‍ನ ಆಚರಣೆ, ಆರಾಧನೆ, ಪರ್ಬೊ, ಜನಪದ ಸಾಹಿತ್ಯೊ, ಭೌತಿಕ ವಸ್ತುಲು ಬೊಕ್ಕೊ ಬೇಸಾಯತ ರೀತಿ-ನೀತಿ, ಸಂಸ್ಕøತಿನ್ ಪ್ರಬಂಧ ರೂಪೊಟು ಕಣ್ಣೂರು ವಿಶ್ವವಿದ್ಯಾನಿಲಯೊಗ್ ಸಲ್ಲಿಸಾತ್ ಪಿಎಚ್.ಡಿ ಪದವಿ ಪಡೆತೆರ್. ಅವುವೇ ವಿಚಾರೊನ್ ದೀತ್ತ್ ಸುಮಾರ್ ಆಜಿನೂದು ಪುಟತ ಬೂಕು ಬುಡುಗಡೆ ಮಲ್ತ್‍ತೇರ್. ತುಳುನಾಡ್‍ತ ಬೆನ್ನಿನ್ ಒರಿಪಾಪುನ ದೃಷ್ಟಿಟ್ ಬೆಂಗಳೂರುತ ಸಹಜ ಸಮೃದ್ಧಿ ಸಂಘಟನೆತ ಬೆರಿಸಾಯೊಟು ‘ಬತ್ತ ಉಳಿಸಿ’ ಆಂದೋಲೊನು ಸುಳ್ಯೊಟು ನಡಪಾತೆರ್.

2003ಟ್ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕೊ ತುಳು ಡೆವಲಪ್‍ಮೆಂಟ್ ಫಾರಮ್‍ತ ಸೇರಿಗೆಟ್ ದೆಹಲಿಟ್ ನಡೆತ್ತಿನ ತುಳು ಬಾಸೆನ್ ಎಣ್ಮನೇ ಪರಿಚ್ಛೇದೊಗ್ ಸೇರ್‍ಸಾವೊಟೋಂದ್ ಪನ್ಪಿನ ಹಕ್ಕೊತ್ತಾಯ ಕಾರ್ಯಕ್ರಮೊಟು ಪಾಲ್‍ಪಡೆತ್, ತುಳು ಸಂಸ್ಕøತಿತ ಬಗ್ಗೆ ಭಾಷಣೊ ಮಲ್ತ್‍ತೆರ್. ಆ ಕಾಲೊಟಿತ್ತಿನ ಕೇಂದ್ರ ಮಂತ್ರಿಲೆನ್ ಭೇಟಿ ಮಲ್ತ್‍ತ್ ಹಕ್ಕೊತ್ತಾಯ ಮಂಡನೆ ಮಲ್ತ್‍ತೇರ್. ಹಿರಿಯ ಜಾನಪದ ಪಾಡ್ದನಗಾರ್ತಿ ಸಣ್ಣಕ್ಕ ಬಂಗ್ಲೆಗುಡ್ಡೆ ಮೇರೆನ್ ಅಕ್ಷರ ಜಗತ್ತ್‍ಗ್ ಪರಿಚಯ ಮಲ್ತಿನ ಮಾತ್ರೊ ಅತ್ತಾಂತ್ ಆರೆನ ಪಾಡ್ದನೊಲೆನ ಸಂಗ್ರಹ ಮಲ್ತೆರ್. ಆರೆಗ್ ತುಳು ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ರಂಗಾಯಣ ಪ್ರಶಸ್ತಿ, ಅತ್ತಾಂತೆ ರಾಜ್ಯೋತ್ಸವ ಪ್ರಶಸ್ತಿ ತಿಕ್ಕುಲೆಕ್ಕೊ ಪ್ರಯತ್ನ ಮಲ್ತೆರ್. ಸುಳ್ಯತ ನಾನೊರಿ ಹಿರಿಯ ಜಾನಪದ ತಜ್ಞೆ ಕೊರಪೊಲು ನಾರಾಜೆ ಮೇರೆಟ ಇತ್ತಿನ ತುಳು ಜಾನಪದ ಕತೆಕುಲೆನ್ ಸಂಗ್ರಹ ಮಲ್ತ್‍ತ್ ‘ಕೊರೊಪೊಳು ಪಂಡಿನ ಕತೆಕುಲೂ’ಂದ್ ತುಳು ಸಾಹಿತ್ಯ ಅಕಾಡೆಮಿತ ಸೇರಿಗೆಟ್ ಬೂಕು ಪ್ರಕಟ ಮಲ್ತ್‍ತೇರ್. ಮುಕುಲು ಅತ್ತಾಂತೇ ವiಸ್ತ್ ತುಳು ಜನಪದ ತಜ್ಞೆರೆನ್ ಅಕ್ಷರ ಜಗತ್ತ್ ಗುರುತಿಸಾಪುಲೆಕ್ಕೊ ಪರಿಚಯೊ, ಸನ್ಮಾನೊ ಮಲ್ತ್‍ತೇರ್. ತುಳು ಅಕಾಡೆಮಿತ ಸಹಕಾರೊಟು ವಾರ್ಷಿಕ ಫೆಲೋಶಿಪ್‍ಟ್ “ತುಳು ಜನಪದ ಶಿಕ್ಷಣಾ”ಂದ್ ಪನ್ಪಿನ ವಿಷಯೊಟು ಅಧ್ಯಯನ ಮಲ್ತ್‍ತ್ ಪ್ರಬಂಧ ಸಲ್ಲಿಸಾತೆರ್. 2016ಟ್ ಆ ಪ್ರಬಂದೊನು ತುಳು ಸಾಹಿತ್ಯ ಅಕಾಡೆಮಿ “ತುಳು ಜಾನಪದ ಸಾಹಿತ್ಯ ಶಿಕ್ಷಣ” ಪನ್ಪಿನ ಬೂಕ್ ಮಲ್ತ್‍ತ್ ಪ್ರಕಟ ಮಲ್ತ್‍ಂಡ್.

ತುಳು ಸಂಸ್ಕøತಿಗ್ ಸಂಬಂಧಪಟ್‍ನ ಮಸ್ತ್ ವಿಚಾರಗೋಷ್ಟಿಲೆಟ್ ಪ್ರಬಂಧ ಮಂಡನೆ, ಉಪನ್ಯಾಸ, ಭಾಷಣ,ಸಮ್ಮೇಳನೊ ಬೊಕ್ಕ ಕಚ್ಚೊಕೊಟ್ಯಲೆಟ್ ಪಾಲ್ಪಡೆತ್ತೇರ್. ಸುಮಾರ್ ಪತ್ರಿಕೆ, ಸಂಚಿಕೆಲೆಟ್ ತುಳು ಲೇಖನೊಲೆನ್ ಪ್ರಕಟ ಮಲ್ತ್‍ತೇರ್. ಮಂಗಳೂರು ಆಕಾಶವಾಣಿಟ್ ತುಳು ಸಂಸ್ಕøತಿತ ಬಗ್ಗೆ ಸುಮಾರ್ ಭಾಷಣೊ ಮಲ್ತ್‍ತೇರ್. ತುಳು ಸಂಸ್ಕøತಿತ ಬಗ್ಗೆ ಅಧಿಕೃತವಾತ್ ಪಾತೆರೊಂತ್ ಬತ್ತ್‍ತ್ತೇರ್. ತುಳು ಸಂಸ್ಕøತಿನ್ ತುಳುನಾಡ್ ಬಡ್ತು ಬೇತೆ ಭಾಗೊಟ್‍ಲಾ ಪರಿಚಯೊ ಮಾಲ್ಪೆರ್ ಕಾರಣೊರಾತೆರ್ ಆಕಾಶವಾಣಿತ ಸೇರಿಗೆಟ್ ಸುಳ್ಯ ತಾಲೂಕುತ ತುಳು ಜಾನಪದ ಸಾಹಿತ್ಯೊದ ಸಂಗ್ರಹಣೆನ್ ರಡ್ಡ್ ಸರ್ತಿ ಮಲ್ಪಾತೇರ್. ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರದ ಸೇರಿಗೆಟ್ ಮೂಜಿ ದಿನೊ ತುಳುನಾಡ್‍ತ ಸುಮಾರ್ 20 ಜಾನಪದ ಕುಣಿತೊಲೆನ್ ವಿಡಿಯೋ ಆಡಿಯೊ ದಾಖಲೀಕರಣ ಮಲ್ತ್‍ತೇರ್. ಕನ್ನಡ ಅಭಿವೃದ್ಧಿ ಪ್ರಾಧಿಕಾರೊ ಬೆಂಗಳೂರು ಬೊಕ್ಕೊ ಅರಿವು ಶಿಕ್ಷಣ ಸಂಸ್ಥೆ ಮೈಸೂರು ಮುಕುಲೆನ ಸೇರಿಗೆಟ್ ತುಳುನಾಡ್‍ತ ವೀರ ಪುರುಷೆರಾಯಿನ ಕೋಟಿ-ಚೆನ್ನಯೆರ್‍ನ ಸಾಕ್ಷ್ಯಚಿತ್ರೊದ ನಿರ್ದೇಶಕೆಯಾತ್ ಕೆಲಸೊ ಮಲ್ತ್‍ತ್ ಯೂ ಟ್ಯೂಬ್‍ಟ್ ಅಯಿನ್ ಅಲವಡಿಸಾತೆರ್.

ಮಂಗಳೂರು ವಿಶ್ವವಿದ್ಯಾನಿಲಯತ ತುಳು ಡಿಪ್ಲೊಮೊ ಕೋರ್ಸ್‍ಗ್ ಪಠ್ಯಕ್ರಮ ತಯಾರಿ ಸಮಿತಿತ ಸದಸ್ಯೆ, ತುಳು ಪಠ್ಯಪುಸ್ತಕ ‘ಎಸೆಲ್’ ಸಮಿತಿತ ಸದಸ್ಯೆ, ಅತ್ತಾಂತೆ ತುಳು ಪಠ್ಯ ಜಾರಿಗ್ ಸಂಬಂಧಪಟ್‍ತ್ ಡಾ.ಪಾಲ್ತಾಡಿ ಬೊಕ್ಕ ಅಕಾಡೆಮಿತ ಒಟ್ಟುಗ್ ಮಸ್ತ್ ಕೆಲಸೊ ಮಲ್ತ್‍ತೇರ್. ಕರ್ನಾಟಕ ಯಕ್ಷಗಾನ ಬಯಲಾಟ ಅಕಾಡೆಮಿತ ಸದಸ್ಯೆ ಆತ್ ತುಳು ಯಕ್ಷಗಾನದ ಬಗ್ಗೆ ಕಾರ್ಯಕ್ರಮೊಲೆನ್ ಸಂಘಟನೆ ಬೊಕ್ಕೊ ಕಲಾವಿದೆರೆಗ್ ಸಹಾಯೊನ್ ಮಲ್ತೊಂದ್ ಬರೋಂದುಲ್ಲೆರ್. ತುಳು ಪಾಡ್ದನ, ಕಬಿತೆ, ಗಾದೆ, ಎದ್‍ರ್ಕತೆ, ಉರಲ್, ಕತೆಕುಲೆನ ಸಂಗ್ರಹ ಮಲ್ತ್‍ತೆರ್. ಜಾನಪದ ಕುಣಿತೊಲೆನ ತಂಡೊಲೆನ್ ಜಿಲ್ಲೆ, ರಾಜ್ಯೊತ ಬೇತೆಬೇತೆ ಕಡೆಟ್ ಪ್ರದರ್ಶನ ಮಲ್ಪೆರೆ ಸಹಕಾರೊ ಮಲ್ತ್‍ತೇರ್.