ನಾಟಕ "ಗಾಂಧೀ ಪಾಪು ಗಾಂಧೀ ಬಾಪುವಾದ ಕತೆ "

                                        

                           ನಾಟಕ "ಗಾಂಧೀ ಪಾಪು ಗಾಂಧೀ ಬಾಪುವಾದ ಕತೆ " 

        

             ಕಳೆದ ಮೂರು ದಿನಗಳಿಂದ ಮೈಸೂರು ರಂಗಾಯಣ ಪ್ರಸ್ತುತ ಪಡಿಸಿದ ನಾಟಕ "ಗಾಂಧೀ ಪಾಪು ಗಾಂಧೀ ಬಾಪುವಾದ ಕತೆ " ಸುಳ್ಯದ ಒಂದಷ್ಟು ಶಾಲಾಕಾಲೇಜುಗಳಲ್ಲಿ ಪ್ರದರ್ಶನ ಕಂಡಿತು. ಗಾಂಧೀಯ ಬಾಲ್ಯದಿಂದ ಹಿಡಿದ ಆ ನಂತರದ ಅವರ ಚಟುವಟಿಕೆಗಳು ಹೇಗೆ ಅವರನ್ನು ಮಹಾತ್ಮನ ಸ್ಥಾನಕ್ಕೆ ತಂದು ನಿಲ್ಲಿಸಿತು ಎನ್ನುವುದನ್ನು ಗಾಂಧೀಜಿಯ ವ್ಯಕ್ತಿತ್ವದಷ್ಟೇ ಪ್ರಖರವಾಗಿ ಕಣ್ಣಿಗೆ ಕಟ್ಟುವಂತೆ ಅಭಿನಯಿಸಿದರು ರಂಗಾಯಣದ ಕಲಾವಿದರು. ಆದ್ದರಿಂದಲೇ ಇರುಬೇಕು, ನಾನು ನೋಡಿದ ಮೂರೂ ಪ್ರದರ್ಶನಗಳಲ್ಲೂ ಕಾಲೇಜಿನ ಸಾವಿರಾರು ವಿದ್ಯಾರ್ಥಿಗಳೂ ನೆಟ್ಟ ದೃಷ್ಠಿಯಲ್ಲಿ ನಾಟಕ ನೋಡಿದ್ದು. 

      ಕೆಲವು ದಶಕಗಳ ಹಿಂದಿನ ವರ್ತಮಾನದಲ್ಲಿ ಬದುಕಿದ  ಗಾಂಧಿ ತನ್ನ ಮನುಷ್ಯ ಪರವಾದ ನಿಲುಗಳಿಂದ ಆ ಕಾಲದ ಬಹುಸಂಖ್ಯಾಕರಿಗೆ ಬೇಕಾಗಿದ್ದರು. ಅದೇ ಗಾಂಧಿಯ ಸಾವಿನ ನಂತರ ಆ ಬಹುಸಂಖ್ಯೆಯನ್ನು ವಿರೋಧಾತ್ಮಕ ದೃಷ್ಟಿಯಿಂದ ಕಾಣುವಂತೆ ಪ್ರೇರೇಪಿಸಲಾಯಿತು. ಇದು ಈ ಭೂತ, ವರ್ತಮಾನ, ಮತ್ತು ಭವಿಷ್ಯವನ್ನು ಸುಳ್ಳೆಂಬಂತೆ ರೂಪಿಸುವ ಹಿನ್ನಲೆಯಿಂದ . ಆದರೆ ಈ ಮೂರು ಕಾಲವೂ ಸತ್ಯವನ್ನು ಒಪ್ಪಿಕೊಳ್ಳಲೇ ಬೇಕೆನ್ನುವ ನೆಲೆಯಲ್ಲಿ ಈ ನಾಟಕದ ಪ್ರದರ್ಶನಕ್ಕೆ ಮಹತ್ವವಿದೆ. ಗಾಂಧಿಯ ಮಾತಿನಲ್ಲೇ ಹೇಳುವುದಾದರೆ ಇದೂ ಒಂದು ಸತ್ಯದ ಆಗ್ರಹ. ಸಾವಿರದ ಎಂಟು ನೂರಕ್ಕೂ ಹೆಚ್ಚು ಬಾರಿ ಪ್ರದರ್ಶನ ಕಾಣುವ ಮೂಲಕ ಈ ನಾಟಕ ಕರ್ನಾಟಕದಾದ್ಯಂತ ಈ ಸತ್ಯದ ಆಗ್ರಹ ನಡೆಸುತ್ತಿದೆ. ಅದಕ್ಕಾಗಿ ರಂಗಾಯಣಕ್ಕೆ ಮತ್ತು ಪರಿಕಲ್ಪನೆಗೆ ನಮನಗಳು. ಪ್ರದರ್ಶನಗೊಳಿಸುತ್ತಿರುವ ಇಲಾಖೆಗಳಿಗೆ, ಹಾಗೇ ಸುಳ್ಯದಲ್ಲಿ ಪ್ರದರ್ಶನಕ್ಕೆ ಅವಕಾಶ ಕೊಟ್ಟ ಎಲ್ಲ ಸಂಘಟಕರಿಗೆ, ನಮ್ಮ ಕೇಳಿಕೆಗೆ ಸ್ಪಂದಿಸಿದ ಎಲ್ಲಾ ಶಾಲಾ ಕಾಲೇಜಿಗಳ ಮುಖ್ಯಸ್ಥರಿಗೆ ಮತ್ತು ಕ್ಷಣಕ್ಷಣದ ಕುತೂಹಲವನ್ನೂ ಕಾತರಿಸುತ್ತಾ ನಾಟಕ ವೀಕ್ಷಿಸಿದ ವಿದ್ಯಾರ್ಥಿಗಳಿಗೆ ವಂದನೆಗಳು.    

27.02.2020                                                                                    ಡಾ.ಸುಂದರ ಕೇನಾಜೆ